11 vieraśnia 2018 hoda były supracoŭnik FSB byŭ zatrymany ŭkrainskimi pamiežnikami pry sprobie patrapić u Rasiju. Pry vobšuku ŭ jaho kanfiskavali aŭtaručku dla schavanaha aŭdyjazapisu, zdymny dysk z sakretnymi danymi i vajenny bilet z zapisam ab słužbie ŭ FSB. Na Fijałkoŭskaha zaviali spravu ab kantrabandzie špijonskaj aparatury, a zatym prysudzili jaho da štrafu. Ciapier jon abvieščany ŭkrainskimi ŭładami ŭ vyšuk, bo jaho zapadozryli ŭ zbory danych ab hrupoŭcy vojskaŭ na Danbasie.
Viarnuŭšysia ŭ Rasiju, eks-aficer śpiecsłužby źviarnuŭsia ŭ SKR i zajaviŭ, što troje biełarusaŭ, u tym liku budaŭnik Andrej Cejka, jaki pražyvaje ŭ Rasii, pranikli ŭ jaho katedž, zrabili jamu injekcyju, jakaja pazbaŭlaje mahčymaści supraciŭlacca, i niezaŭvažna dla žonki i dziaciej, vykrali jaho, prychapiŭšy dakumienty na mašynu Fijałkoŭskaha. Zatym jaho vyvieźli va Ukrainu i niekalki dzion trymali ŭ padvale, vymahajučy ci to 15, ci to 50 miljonaŭ rasijskich rubloŭ, paśla čaho adpuścili.
Śledčym udałosia zatrymać tolki adnaho mierkavanaha vykradalnika — budaŭnika Cejku, jaki pierasoŭvajecca na mylicach paśla skačka z parašutam.
Jaho abarona zapeŭnivaje, što Fijałkoŭski dobraachvotna jechaŭ ź biełarusami za miažu, a zatym prydumaŭ historyju z vykradańniem, kab schavać fakt pajezdki va Ukrainu. Heta paćviardžaje błytanina ŭ jaho pakazańniach, a taksama śviedki, jakija adznačyli, što čutnaść u domie byłoha aficera nie dazvoliła b nieprykmietna jaho vykraści. Akramia taho, pierad pierasiačeńniem miažy z Ukrainaj, Fijałkoŭski vychodziŭ na suviaź sa svaim znajomym i spakojna paviedamiŭ ab tym, što chutka vierniecca dadomu, nie zhadvajučy vykradańnie.
