Pra zatrymańnie źviazanaha z BYPOL byłoha vajskoŭca-kantraktnika 25-hadovaha Ramana Marusava raspavioŭ namieśnik ministra ŭnutranych spraŭ Hienadź Kazakievič u efiry BT-1.
Marusaŭ prachodziŭ słužbu pa kantrakcie ŭ siłach śpiecyjalnych apieracyj Minabarony. Paśla zvalnieńnia jon źviazaŭsia ź inicyjatyvaj BYPOL. Kazakievič śćviardžaje, što Marusaŭ — «vielmi radykalna nastrojeny małady čałaviek, prychilnik ultrapravych pohladaŭ nieanacysckaha tołku».
Nibyta jon płanavaŭ vyjechać u Ivana-Frankoŭsk dla padrychtoŭki ŭ śpiecyjalnym trenirovačnym łahiery «Pravaha siektara» i nastupnaha ŭdziełu ŭ bajavych dziejańniach na terytoryi Ukrainy.
Namieśnik kiraŭnika MUS zajaviŭ ab najaŭnaści «suviazi» pamiž Marusavym i anarchistam Dziadkom.
— U Marusava padčas pieratrusu kanfiskavali knihu Dziadka z darčym nadpisam. Jon užo nijak ad hetaj spravy nie adkrucicca, — zajaviŭ Kazakievič.
Varta adznačyć, što ultrapravyja i anarchisty znachodziacca na procilehłych kancach ideałahičnaha śpiektru i, jak praviła, nie pierasiakajucca. Ci ž moh być Marusaŭ ultrapravym i adnačasova źviazanym ź Dziadkom?
Kazakievič pieraličyŭ ludziej, jakija, pa mierkavańni MUS, składajuć kaściak inicyjatyvy BYPOL: Astapovič, Łoban, Kuprejčyk, Žyhar, Łupanosaŭ, Azaraŭ, Talerčyk, Makar, Miadźviedzieŭ.
Kazakievič raspavioŭ, jak siłaviki prysutničajuć u sacsietkach, hrupach i čatach, u tym liku zakrytych, i «ź niekatorym sarkazmam nazirajem za patuhami našych zamiežnych zmaharoŭ raspačać niejkija miery kanśpiracyi».
