Asnoŭnaja vakcyna — «Sputnik V» («Ham-KAVID-VAK») rasijskaj vytvorčaści. Siońnia Minzdaroŭja ŭžo anansavała, što «Biełmiedpreparaty» pačali pramysłovy vypusk rasijskaj vakcyny suprać karanavirusa, a mienavita — raźlivańnie pieršych sieryj. Akramia taho, u lutym Biełaruś atrymała sto tysiač doz kitajskaj vakcyny ad kampanii Sinopharm.
Raspytali biełarusaŭ, jakija pryščapilisia, pra reakcyju arhanizma na rasijskuju vakcynu i pryčyny, pa jakich jany dobraachvotna pajšli na vakcynacyju ŭ pieršych šerahach.
Vakcynacyju «Sputnikam V» pravodziać u dva etapy: spačatku ŭvodziać pieršy kampanient (0,5 mł), a na 21-y dzień — druhi kampanient u takoj samaj dozie. Dla praviadzieńnia vakcynacyi jość ceły śpis supraćpakazańniaŭ: naprykład, vostryja infiekcyjnyja i nieinfiekcyjnyja zachvorvańni, abvastreńnie chraničnych zachvorvańniaŭ, ciažarnaść, pieryjad hrudnoha karmleńnia i inš.
Natalla, supracoŭnica dziciačaha sadka, 42 hady:
— U majoj siamji na karanavirus chvareŭ brat. Try tydni jon pravioŭ na samaizalacyi, vielmi drenna siabie adčuvaŭ. Nastupstvy jość dahetul. Ja vyrašyła, što nie mahu sabie dazvolić tak doŭha chvareć, tamu i vyrašyła pryščapicca.
Pieršuju pryščepku zrabili 3 lutaha.
Było trochi strašna, bo ŭsio ŭpieršyniu, u testavym režymie.
Praces uviadzieńnia vakcyny zaniaŭ siekundy try. Ja adčuła sam ukoł, a jak uvodziŭsia preparat — užo nie. 30 chvilin paśla nas paprasili nikudy nie sychodzić. Tolki paśla taho jak miedsiastra pierakanałasia, što ŭsie my dobra siabie adčuvajem, dazvolili syści.
Da 22.00 zusim nijakich nastupstvaŭ nie nazirałasia. Bližej da 23.00 źjavilisia dryžyki, pavialičyłasia tempieratura. Ja vypiła abiazbolnaje — praktyčna praz hadzinu ŭsie simptomy minuli. Na nastupny dzień tempieratury ŭžo nie było. Adzinaja niazručnaść: niekalki dzion paśla pryščepki mocna baleła miesca ŭkołu.
Paśla druhoj pryščepki tempieratury i dryžykaŭ užo nie nazirałasia. Važna było nie zachvareć ciaham troch tydniaŭ, pakul nie vypracujecca imunitet. Na ciapierašni momant adčuvaju siabie dobra. Chočacca vieryć, što ŭ arhaniźmie źjavilisia antycieły, i maje lohkija ŭ biaśpiecy.
Aleh, doktar-terapieŭt, 36 hadoŭ
— Niahledziačy na toje što pracuju z chvorymi na karanavirusnuju infiekcyju, sam jašče nie chvareŭ. Praŭda, u listapadzie byli simptomy VRVI, ale dyjahnaz COVID-19 nie paćvierdziŭsia. Pracujučy ŭ adździaleńni, sustrakaŭsia z roznymi pacyjentami. Asabliva baluča ŭśviedamlać, kali pastupaje chvory i ty ŭžo razumieješ, što naŭrad ci jamu dapamožaš. Pry tym što ŭ inšy čas, pry inšych abstavinach hety čałaviek moh by žyć jašče doŭha i ščaśliva. Tamu sumnievaŭ z nahody vakcynacyi ŭ mianie asabista nie było. Pierad pryščepkaj abśledavańnie na najaŭnaść antyciełaŭ nie rabiŭ.
15 sakavika paśla papiaredniaha ahladu mnie ŭviali adzin kampanient rasijskaj vakcyny Ham-KAVID-VAK. Naŭprost padčas ukołu nijakich balučych adčuvańniaŭ nie było, ale ciaham sutak źjaviŭsia lohki bol u ruce, jaki prajšoŭ ciaham nastupnych 24 hadzin.
Druhaja pryščepka budzie ŭžo na pačatku krasavika. U pierapynku miž imi imknusia vykonvać usie miery prafiłaktyki, asabliva pry naviedańni hramadskich miescaŭ: abaviazkova vykarystoŭvaju masku, staranna i nieadnarazova apracoŭvaju ruki antysieptykam, paźbiahaju blizkaha kamunikavańnia z tymi, chto kašlaje i nie nosić masak.
Valancina, doktar-epidemijołah, 53 hady
— Pieršuju pryščepku mnie zrabili 3 lutaha. Kali ščyra, pierad pachodam da doktara paniervavałasia: usio ž vakcyna novaja, nie da kanca vyprabavanaja. Ale ŭ pryncypie ja zaŭsiody pryščaplajusia. Na moj pahlad, vakcynacyja — heta adzinaja efiektyŭnaja prafiłaktyčnaja miera, i nierazumna joj nie skarystacca
Niejkich balučych adčuvańniaŭ ad ukołu nie było. Paśla 30 chvilin miedyčnaha nazirańnia ja praciahnuła zajmacca pracoŭnymi pytańniami. A voś na nastupny dzień užo adčuvała niejkuju raźbitaść i raśsiejanaść. U ruce naziraŭsia nievialiki ciažar i nyjučy bol, jaki pratrymaŭsia kala tydnia. U suviazi z hetym, ja b raiła ŭsim, chto tolki źbirajecca rabić pryščepku, abirać dla jaje ruku, na jakoj vy nie śpicie.
Druhi ŭkoł byŭ pryznačany na 24 lutaha. Pamiž pryščepkami ja, viadoma, imknułasia nie zachvareć (nasiła masku, imknułasia abmiežavać kantakty). Najpierš tamu, što chaciełasia skončyć imunizacyju. U dzień imunizacyi znoŭ pačuvałasia dobra, ale ŭnačy časta pračynałasia ad łamoty ŭ pajaśnicy. Ranicaj vyrašyła prakantralavać tempieraturu — na hraduśniku było 37,3°. Ale ŭžo praz hadzinu tempieratura narmalizavałasia. Bol u miescy ŭkołu pa intensiŭnaści byŭ taki samy, jak i pieršym razam, ale pratrymaŭsia ŭsiaho dva dni.
Dla mianie pryščepka — nadzieja, što chvaroba abydzie bokam. Tym bolš kali prahnazujecca treciaja chvala. Strach jak nie lublu lačycca, chadzić pa daktarach. A jašče strašna stracić zdolnaść samu siabie absłuhoŭvać.
Halina, vychavacielka dziciačaha sadka, 46 hadoŭ
— Raz ja pracuju vychavalnicaj, to maju šyroki kantakt z roznymi ludźmi — ad dziaciej da ich baćkoŭ. U našym sadku ŭžo byli vypadki zachvorvańnia, ale asabista ŭ mianie nijakich simptomaŭ chvaroby nie było.
Testaŭ na antycieły taksama nie zdavała. Doktarka pry ahladzie skazała, što, navat kali i pierachvareŭ bieśsimptomna, to pryščepka taksama nie supraćpakazanaja. Nijakich niedamahańniaŭ. Pierad pryščepkami i pamiž imi pavodziła siabie jak zvyčajna: nijakich śpiecyjalnych mier nie vykonvała. Praŭda, miedsiastra skazała nie mačyć miesca injekcyi ciaham pary dzion — voś heta vykanała.
Pakul u našym sadku ja pryščeplenaja adna, ale hanarusia saboj, što, niahledziačy na skiepsis atačeńnia, pryščapiłasia i ciapier u mianie jość choć niejkaja abarona.
Ludmiła, supracoŭnica centra sacyjalnaha absłuhoŭvańnia nasielnictva, 52 hady
— Viasnoj minułaha hoda ja ciažka chvareła: u mianie była strašnaja zadyška, lažała ŭ špitali, ale na karanavirusnuju infiekcyju mianie nie abśledavali. Kali ŭ listapadzie znoŭ źlahła ź pnieŭmanijaj, pravieryli na najaŭnaść antyciełaŭ, ale ŭ analizie byli vyjaŭleny tolki imunahłabuliny G. Jak mnie patłumačyli daktary, heta aznačaje, što ja, napeŭna, pierachvareła raniej (chutčej, jakraz viasnoj). U lutym ja jašče raz pravieryła antycieły, bo čuła, što jany paśla chvaroby doŭha nie zachoŭvajucca. I, praŭda: u mianie byŭ całkam admoŭny test. Mienavita tamu, daviedaŭšysia, što ŭ naš rajonny špital pryvieźli vakcynu i, pamiatajučy, jak drenna mnie było minułaj viasnoj, ja patelefanavała i zapisałasia na vakcynacyju.
Ja, viadoma, pieražyvała, jak pieraniasu pryščepku, bo ŭ mianie, možna skazać, byŭ «bukiet» chraničnych zachvorvańniaŭ: i nyrki niezdarovyja, i serca dureje, i ščytavidka vydalenaja, i prablemy ź ciskam. Na dziva, nijakich prajaŭ paśla ŭkołu ŭ mianie nie było.
Moža, tolki ŭ dzień pryščepki, z unutranaha boku ruki byŭ niaznačny bol.
Druhaja pryščepka pryznačanaja na pačatak krasavika. Spadziajusia, što i jaje pieraniasu lohka.
