Hałasavańnie sutki da hetaha było zapuščana na płatformie «Hołas». Za pieršyja 24 hadziny ŭ im uziało ŭdzieł bolš za 450 tysiač čałaviek.
Daradca Cichanoŭskaj u mižnarodnaj palitycy Franak Viačorka tak prakamientavaŭ zroblenuju pracu, a taksama pierśpiektyvy:
«Była zroblenaja vialikaja praca, kab my pryjšli da hetaha momantu. U nas jość pazityŭnyja sihnały ad našych siabroŭ, ad mižnarodnych arhanizacyj.
My ličym, što pieramovy pavinny pačacca ŭ mai. Da hetaha času pavinny adbyvacca kansultacyi i ekśpiertnyja sustrečy ŭ roznych farmatach, u tym liku z udziełam patencyjnych miedyjataraŭ. Važna stvaryć kaalicyju krain, jakija buduć sačyć za vykanańniem damoŭlenaściaŭ.
Jość roznyja farmaty hetaj kaalicyi, jość farmaty, jakija nazyvajuć Narmanski, Budapiešcki, my znojdziem svoj biełaruski farmat, jaki zabiaśpiečyć maksimalnuju vykanalnaść damoŭlenaściaŭ.
Naša meta — vybary sioleta. Učora delehacyi ES u ABSIE paćvierdzili padtrymku hetaj mety, kab vybary adbylisia nie ŭ 2022 hodzie, jak hetaha choča Łukašenka, a mienavita sioleta.
Treba razhladać usie varyjanty miescaŭ dla pieramoŭ, farmataŭ. Pieramovy buduć adbyvacca na roznych uzroŭniach, u roznych farmatach, z roznymi ludźmi. Ja dumaju, što pačnucca sustrečy, mahčyma, u zakrytym režymie. Pieršyja kansultacyi całkam realna buduć nie na temu novych vybaraŭ, a chutčej za ŭsio — pieršasnyja pytańni, jak vyzvaleńnie palitviaźniaŭ i spynieńnie hvałtu. Potym možna pierajści da bolš važnych pytańniaŭ».
