Paśla pieramožnaj šajby piciercaŭ zaŭziatary na «Minsk-Arenie» zładzili abstrukcyju arbitram matču, jakija pakinuli minčukoŭ utroch suprać piaciorki SKA. Paśla čaho na lod i na łaŭku SKA palacieli butelki.
U repartažy ANT kazałasia nastupnaje:
«Hučnym skandałam zaviaršyŭsia treci matč płej-of Kantynientalnaj chakiejnaj lihi pamiž minskim «Dynama» i SKA z Sankt-Pieciarburha. Los napružanaj sustrečy vyrašyła nie majsterstva chakieistaŭ i taktyčnyja rašeńni trenieraŭ — na dapamohu rasijskaj kamandzie pryjšli sudździ.
Sprečnyja vydaleńni byli i ŭ pieršych matčach supiernikaŭ — SKA pavioŭ u sieryi 2:0. «Dynama» nie zdavałasia i pry padtrymcy amal 12 tysiač hledačoŭ — heta rekord siezona ŭ KCHŁ — było blizka da pieršaj pieramohi. Sastupajučy ŭ liku, naš kłub pieravioŭ matč u aviertajm — 3:3. U dadatkovy čas sudździ nie zaŭvažyli parušeńnie na Šejnie Prynsie, a zatym, litaralna adrazu ž, dvojčy vydalili hulcoŭ «Dynama». SKA takim padarunkam skarystaŭsia — 4:3. Emocyj paśla hulni nie strymlivali ni zaŭziatary, ni treniery «Dynama». Praduziataść da narodnaj kamandy prosta nie vytrymlivaje nijakaj krytyki.
Sudziejskija pamyłki ŭ sieryi «Dynama» — SKA pryznajuć usie ekśpierty, u tym liku i rasijskija. Takoha adkrytaha «spłavu» nie zasłužyli ni hulcy, ni zaŭziatary. Toje, što adbyłosia, nahadvaje chamstva i pierajšło ŭsie miežy. Ale biełaruski kłub nie zdajecca, pa hulni minčanie ni ŭ čym nie sastupajuć supierniku. Nastupny matč sieryi kamandy praviaduć na «Minsk-Arenie» ŭ paniadziełak, pačatak u 17:10. Budziem zaŭzieć za sapraŭdny chakiej», — havorycca ŭ paviedamleńni ANT.
Taksama i ŭ prajektach na «Biełaruś 1» vyjšli siužety z krytykaj na adras sudździaŭ i SKA.
