Jak piša RBK, u ofisie prezidenta Ukrainy Uładzimira Zialenskaha sprabavali pieraškodzić vychadu filma-rasśledavańnia Bellingcat ab śpiecapieracyi zachopu ŭdzielnikaŭ PVK «Vahniera» pry dapamozie brytanskich śpiecsłužbaŭ. Pra heta paviedamlaje zn.ua sa spasyłkaj na ŭłasnyja krynicy.
Pavodle źviestak vydańnia, aŭtaru budučaha filma-rasśledavańnia ab śpiecapieracyi Chrysta Hrozievu telefanavaŭ asabista kiraŭnik ofisa Zialenskaha Andrej Jarmak, jaki chacieŭ daviedacca pra padrabiaznaści rasśledavańnia.
Akramia hetaha, jak paviedamlaje zn.ua, Kijeŭ sprabavaŭ pieraškadžać vychadu filma praz brytanskuju vyviedku. Vydańnie piša, što ŭ lutym 2021 hoda Ukrainu naviedvaŭ namieśnik kiraŭnika Mi-6 Li Łoŭrens. Padčas pieramovaŭ dziejny kiraŭnik ukrainskaj vyviedki Kirył Budanaŭ i namieśnik kiraŭnika ofisa Zialenskaha Raman Mašaviec prasili Łoŭrensa, kab Brytanija paŭpłyvała na Bellingcat, nie dapuściŭšy vychadu budučaha filma. Adnak, pa dadzienych žurnalistaŭ, brytanski bok admoviŭ u prośbie ŭkrainskich uładaŭ, patłumačyŭšy, što ŭ Brytanii svaboda słova. Vydańnie nakiravała adpaviedny zapyt u pasolstva Brytanii va Ukrainie, ale tam admovilisia kamientavać pytańni, źviazanyja z pracaj śpiecsłužbaŭ.
Nahadajem, hrupu z 33 čałaviek zatrymali ŭ Biełarusi 29 lipienia 2020 hoda. U biełaruskim KDB zajavili, što zatrymanyja akazalisia supracoŭnikami PVK, u dačynieńni da ich raspačali kryminalnyja spravy ab padrychtoŭcy teraktu i padrychtoŭcy masavych biesparadkaŭ. BiełTA pisała, što rasiejcy pryjechali ŭ krainu, kab destabilizavać abstanoŭku napiaredadni vybaraŭ 9 žniŭnia. U Kramli zatrymańnie nazvali biespadstaŭnym. 14 žniŭnia Minsk pieradaŭ rasiejcaŭ Maskvie.
U toj ža čas u Kijevie patrabavali vydačy častki zatrymanych, pakolki ich ułady Ukrainy padazrajuć u teraryźmie i ŭdziele ŭ kanflikcie na Danbasie. Prezident Uładzimir Zialenski nazvaŭ rašeńnie Minska pieradać zatrymanych Maskvie niespraviadlivym.
Paźniej prezident Rasiei Uładzimir Pucin zajaviŭ, što rasiejcaŭ «vykarystoŭvali naŭhad», vymaniŭšy ŭ Biełaruś. Pavodle jaho słoŭ, za apieracyjaj stajać ukrainskija i amierykanskija śpiecsłužby.
U kancy śniežnia eks-prezident Ukrainy, lidar partyi «Jeŭrapiejskaja salidarnaść» Piatro Parašenka zajaviŭ, što mienavita jon inicyjavaŭ apieracyju zatrymańnia ŭ Biełarusi 33 rasiejcaŭ. Pa jaho słovach, zryŭ apieracyi źjaŭlajecca dziaržaŭnaj zdradaj, za jakoj stajać «peŭnyja asoby».
U śniežni rasśledvalnik mižnarodnaj arhanizacyi Bellingcat Chrysta Hrozieŭ zajaviŭ, što jon pracuje nad filmam pra śpiecapieracyju «vahnieraŭcaŭ» u Biełarusi. Adnak pra padrabiaznaści rasśledavańnia jon nie raspavioŭ, udakładniŭšy, što vychad filma zapłanavany na pieršuju pałovu 2021 hoda.
