Maskva abiacaje «žorstkija miery» suprać niamieckich žurnalistaŭ, jakija pracujuć u Rasii, kali Bierlin nie zabiaśpiečyć narmalnuju pracu rasijskich žurnalistaŭ u Niamieččynie. Pra heta zajaviła pradstaŭnica MZS Rasii Maryja Zacharava, piša VVS.
Jana paviedamiła, što 26 lutaha niamiecki Commerzbank piśmova paviedamiŭ pra zakryćcio rachunkaŭ i spynieńnie ŭsich finansavych apieracyj Russia Today i Ruptly (videaahienctva RT) u Hiermanii z 31 maja hetaha hoda.
Bank patłumačyŭ rašeńnie svaim pravam «zaviaršyć supracoŭnictva z klijentam u adnabakovym paradku biez tłumačeńnia pryčyny».
«Z usioj surjoznaściu zaklikajem Bierlin adumacca, zabiaśpiečyć narmalnaje funkcyjanavańnie nazvanych miedyjakampanij, admianić lubyja restryktyŭnyja mierapryjemstvy, jakija abciažarvajuć pracu ŚMI», — zajaviła Maryja Zacharava, papiaredziŭšy ab žorstkich mierach u adkaz.
U Russia Today taksama paviedamili, što ciapierašnija padziei — nie pieršyja ŭskładnieńni dla hetaha kanała ŭ Hiermanii, i nie ŭpieršyniu prablemy datyčacca mienavita finansaŭ.
«Uličvajučy, što Sommerzbank biez tłumačeńnia pryčyn zakryvaje našy rachunki, a blizu 20 niamieckich i mižnarodnych finansavych instytutaŭ admovili nam u supracoŭnictvie, u nas jość pryčyny mierkavać, što suprać RT u Niamieččynie prachodzić kampanija, jakaja, faktyčna, zvodzicca da finansavaha embarha», — cytuje RT kiraŭnicu kanała ŭ Niamieččynie Dynaru Taktasunavu.
2 sakavika ZŠA i ES adnačasova ŭviali sankcyi ŭ dačynieńni da rasijskich top-čynoŭnikaŭ, jakich padazrajuć u datyčnaści da pieraśledu rasijskaha apazicyjaniera Alaksieja Navalnaha. Paśla atručvańnia jon lačyŭsia mienavita ŭ Niamieččynie, adkul viarnuŭsia ŭ Rasiju 17 studzienia hetaha hoda.
