— U dziejańniach nastaŭnika ŭhledžvajecca skład kryminalna-karalnaha dziejańnia, praduhledžanaha artykułam 153 KK. Adnak hety artykuł adnosicca da spravaŭ pryvatna-publičnaha abvinavačvańnia i zavodzicca nie inakš jak pa zajavie asoby, paciarpiełaj ad złačynstva. Tamu ŭ zaviadzieńni kryminalnaj spravy admoŭlena. Zajaŭnik moža raspačać u sudzie spravu pryvatnaha abvinavačvańnia, adnak baćka školnika ŭžo napisaŭ zajavu, što pretenzij da nastaŭnika nie maje, da adkaznaści pryciahvać nie žadaje, — raspavioŭ Tut.by aficyjny pradstaŭnik UUS Homielskaha abłvykankama Vital Prystromaŭ.
— Tak, vyrašyli nie źviartacca, — paćvierdziŭ baćka paciarpiełaha chłopčyka Mikałaj. — Nichto na nas nie cisnuŭ, prosta škada stała čałavieka, u jaje [nastaŭnicy] dzieci źbirajucca ŭ milicyju iści, mohuć być prablemy — nie chaču łamać im los. Dy i sama jana raskajałasia i prasiła prabačeńnia.
Mužčyna raspavioŭ, što nastupstvy traŭmy syn adčuvaje dahetul: u chłopca časta balić hałava i sa sportam (Arciom zajmajecca dziudo) na paŭhoda pryjšłosia raźvitacca. Dzicia naziraje nieŭrapatołah.
Nahadajem, 18 studzienia paśla ŭrokaŭ vučań 6-ha kłasa škoły horada Čačerska apynuŭsia ŭ balnicy. U dziciaci dyjahnastavali udar iłba i čerapna-mazhavuju traŭmu.
Jak vyśvietliłasia, na ŭroku pamiž školnikam i nastaŭnikam biełaruskaj movy i litaratury adbyŭsia kanflikt. Paśla hetaha dzicia pajšło dadomu, i tam rodnyja zaŭvažyli, što z chłopcam niešta nie toje. Chłopčyk raspavioŭ babuli, što ŭ kłasie ŭsie šumieli, i ŭ niejki momant nastaŭnica ŭziała jaho za šyju i ŭdaryła ab partu hałavoj. Nastaŭnica kazała, što jon udaryŭsia sam.
U balnicy chłopiec pravioŭ tydzień.
