Fota Nadziei Bužan.
Kali ludzi siońnia nabyvajuć tradycyjny aŭtamabil, to jany ŭpeŭnienyja, što ŭ im ničoha kardynalna nie budzie źmianiacca na praciahu niekalkich hadoŭ. Adnak na dumku Kłausa Hurbiera, ekśpierta pa aŭtamabilnym prahramnym zabieśpiačeńni, u chutkim časie aŭtamabili, u jakich vykarystoŭvajecca ŭsio bolš prahramnaha zabieśpiačeńnia, buduć źmianiacca ledź nie kožnyja try miesiacy.
«Ludzi buduć atrymlivać pastajannyja adnaŭleńni prahramnaha zabieśpiačeńnia, anałahičnyja tym, jakija kožny atrymlivaje na smartfonie ci noŭtbuku siońnia», — pierakanany Kłaus Hurbier.
Kłaus Hurbier vyvučaje prablemy, ź jakimi sutyknucca aŭtavytvorcy pa miery raspaŭsiudžvańnia ŭ halinie IT-technałohij. Ekśpiert miarkuje, što zatraty aŭtavytvorcaŭ na raspracoŭku prahramnaha zabieśpiačeńnia dla aŭtamabilaŭ pavialičacca ŭdvaja na praciahu nastupnaha dziesiacihodździa.
Aŭtamabilnaja pramysłovaść usio chutčej pierachodzić da elektramabilaŭ, jakija buduć patrabavać jašče bolš mocnych IT-technałohij, piša DW.
Kampjutary vykarystoŭvajucca ŭ aŭtamabilach i traktarach užo peŭny čas, adnak pakul što pracuje heta tak: elektronika asobna kantraluje pracu ruchavika, kandycyjaniera abo adkryćcio voknaŭ.
U aŭtamabilach budučyni ŭsie hetyja zadačy buduć apracoŭvacca centralizavana. Hałoŭny kampjutar budzie adkazvać za kantrol usiaho, a jaho prahramnaje zabieśpiačeńnie pieryjadačna adnaŭlacca z dapamohaj technałohij 5G. Takim čynam aŭtavytvorcy, pa sutnaści, pieravažna stanuć vytvorcami prahramnaha zabieśpiačeńnia.
Paśla adnaŭleńniaŭ na smartfonie karystalniki časta skardziacca na peŭnyja prablemy ŭ pracy telefona. Z tym ža sutykajucca i aŭtavytvorcy, jakija prasoŭvajuć ličbavyja rašeńni ŭ vytvorčaści aŭtamabilaŭ.
Niaspraŭnaje prahramnaje zabieśpiačeńnie ŭ aŭtamabili patencyjna moža zabivać, tamu jano pavinna być maksimalna nadziejnym. Na dumku eskpiertaŭ, biaśpieka moža być harantavana tolki dziakujučy ščylnamu supracoŭnictvu aŭtavytvorcaŭ z technałahičnymi kampanijami.
Kłaus Hurbier ličyć, što ŭ vyniku hetaha supracoŭnictva buduć raspracavanyja dźvie-try najlepšyja apieracyjnyja sistemy, jakija i buduć vykarystoŭvać bolšaść aŭtavytvorcaŭ va ŭsim śviecie.
Budučynia biełaruskaha aŭtabudavańnia taksama budzie zaležać ad zdolnaści našaj dziaržavy raźvić IT-siektar. Inakš u tym, što budzie składać asnoŭnuju častku koštu hruzavika ci traktara, my budziem zaležać ad raspracovak inšych krain.
