Źvinavacili žančynu va ŭdziele ŭ masavaj akcyi pa č. 3. art. 23.34 i niepadparadkavańni supracoŭnikam milicyi pa artykule 23.4.
Halina Hulankova nie pryznała siabie vinavataj. Pa słovach syna, jana zajaviła, što jechała na rynak u Ždanovičy, u jaje była z saboj kniha Vasila Bykava. Kali jana vyjšła z elektryčki, na peronie da jaje padyšoŭ mužčyna ŭ adzieńni rybaka, jaki trymaŭ ledabur.
«Jon schapiŭ mamu za ruku i skazaŭ: «Projdziem». Mama razhubiłasia i pajšła za im. Mužčyna akazaŭsia ŭčastkovym, jon zavioŭ mamu ŭ aŭtobus. Mama nie supraciŭlałasia, — kaža Maksim, 31-hadovy syn Haliny Hulankovaj. — Śviedka, jaki vystupaŭ u sudzie pad pseŭdanimam, skazaŭ, što Halina Hulankova na peronie zaklikała ludziej da niejkich dziejańniaŭ, jakija źnievažajuć uładu, machała rukami. Mama skazała, što śviedka łže i jaje zatrymlivaŭ zusim inšy čałaviek».
Sudździa Michaił Makarevič nie pahadziŭsia prahledzieć videa z kamer nazirańnia, niahledziačy na prośby Haliny Hulankovaj.
«Mama była ŭ adčai, ciažka było jaje čuć. Spytała ŭ sudździ: što joj, jašče 17 sutak siadzieć? Sudździa skazaŭ: tak, pažadaŭ joj usiaho dobraha i pajšoŭ. Ździŭlaje takaja abyjakavaść da ludziej. Heta stałyja ludzi, i ź ich tak ździekujucca, — kaža Maksim. — Pieršaje, što maci spytałasia ŭ sudździ, — ci narmalna heta, što stałaja žančyna z chvoraj śpinaj śpić trecija sutki na padłozie? Ale sudździa skazaŭ, što hetaje pytańnie nie ŭ jahonaj kampetencyi».
Pavodle Maksima, u maci chvoraja śpina, balić naha, jana chodzić z kijočkam. Šmat chto napisaŭ u sacyjalnych sietkach i vykazaŭ padtrymku jahonaj maci.
«U jaje ankalohija, joj vydalali ščytapadobnuju załozu, jana staić na ŭliku. Jana prymaje tabletki i zvyčajna starajecca brać z saboj peŭnuju ich kolkaść, bo, uličvajučy siońniašniuju sytuacyju ŭ krainie, nia viedaješ, dzie apynieśsia zaŭtra», — raskazvaje syn.
Maksim čakaje, kudy pieraviaduć maci i kali budzie mahčymaść pieradać joj pieradaču.
Halina Hulankova — karennaja miančanka, veteran pracy, šmat hadoŭ adpracavała na pradpryjemstvie «Haryzont».
«Mama davoli aktyŭny i pazytyŭny čałaviek, zaŭsiody idzie nasustrač ludziam, zaŭsiody starajecca dapamahčy», — kaža syn Haliny Hulankovaj.
