Sud Zavodskaha rajona Minska praciahvaje razhlad spravy Alaksieja Ścierlikava — minčuka, jaki ŭ noč paśla inaŭhuracyi razam z žonkaj uciakaŭ ad sotni siłavikoŭ pa praśpiekcie Dziaržynskaha. Pahonia skončyłasia ŭ dvarach na vulicy Razinskaj. Pry hetym byŭ traŭmavany inśpiektar DAI Michaił Zavadski — jon naskočyŭ na «Falksvahien» Ścierlikava, jaki ruchaŭsia zadnim chodam. A paśla atrymaŭ udar adčynienymi dźviaryma.
Alaksiej Ścierlikaŭ
«Naša Niva» pisała pra pieršy dzień suda, na jakim vystupali žonka Ścierlikava i śviedki-daišniki. U druhi dzień vystupaŭ jašče adzin śviedka i začytvalisia materyjały spravy.
Ich źmiest demanstruje niekatoryja mietady pracy siłavikoŭ, pra jakija šmat chto nie zdahadvajecca.
Pa-pieršaje, da materyjałaŭ spravy prykładzieny aŭdyjazapis telefonnaj razmovy Taćciany Ścierlikavaj, žonki abvinavačanaha. U dakumientach adznačana, što ŭ jaje byŭ ajfon, a hety smartfon zabaraniaje karystalniku zapisvać svaje razmovy. Možna mierkavać, na momant razmovy ź siabroŭkaj Taćcianu Ścierlikavu (ranica 24 vieraśnia) užo prasłuchoŭvali.
Choć heta adbyłosia praź ličanyja hadziny paśla pahoni i zatrymańnia muža.
Pa-druhoje, śledstva padrychtavała padradkoŭniki razmoŭ Alaksieja Ścierlikava na Akreścina. Ni dla kaho nie sakret, što časam ŭ kamiery padsadžvajuć śpiecyjalna navučanych ludziej, kab tyja razhavaryli aryštantaŭ i paśla zaśviedčyli heta ŭ sudzie. Ale jak vyjaŭlajecca, aŭdyjazapis viadziecca ŭvieś čas, a siłaviki mohuć abirać dla siabie patrebnaje i cikavaje. Heta nazyvajecca «apieratyŭna-vyšukovyja mierapryjemstvy».
Kala sotni siłavikoŭ abstupili aŭtamabil sa Ścierlikavym i raźbivajuć jaho
U sudzie prakuror Volha Dzilindzievič začytvała tekst abranych razmoŭ z kamiery, praz chutkaść čytańnia razabrać niešta było składana, tolki asobnyja momanty.
Aŭdyjazapisy zroblenyja na Akreścina 24-25 vieraśnia, u pieršyja dni znachodžańnia Ścierlikava za kratami. Heta čas, kali z zatrymanaha starajucca atrymać maksimum infarmacyi. Na dopycie jon jaje moža nie kazać, ale paśla dzielicca z sukamiernikami — čaho i čakajuć siłaviki.
Admietnaść situacyi ŭ tym, što Ścierlikaŭ znachodziŭsia ŭ kamiery z dvuma ludźmi — hałoŭnym redaktaram «Našaj Nivy» Jahoram Marcinovičam (padazravany pa spravie za «paklop») i Michaiłam Vajciachoŭskim (45-hadovy minčuk ź niekalki adsiedkami, padazravany pa spravie ab kradziažy mabilnika).
U materyjałach śledstva jany nie nazyvajucca pa imionach, a pradstaŭlenyja jak «V., surazmoŭca» i «K., surazmoŭca». Adnak pakolki Jahor Marcinovič razmaŭlaŭ pa-biełarusku, to i ŭ padradkoŭniku jaho słovy zapisvali pa-biełarusku. Tamu prakuror, apisvajučy źmiest razmovy, časam rabiła ŭdakładnieńni: «Na biełaruskaj movie idzie abmierkavańnie infarmacyi palityčnaha charaktaru».
Jak vyhladajuć typovyja razmovy ŭ kamiery? «Naša Niva» zanatavała niekatoryja dyjałohi z Akreścina, ahučanyja ŭ sudzie.
Akreścina. Ilustracyjnaje fota
***
— Nu a mient, jakoha ty źbiŭ na mašynie, jon u balnicy zaraz?
— Pisali, što ŭ jaho niejki razryŭ źviazak halenastopa, udar palcaŭ, plača.
— Nie, nu sudździa ž taksama *nierazborliva*. Toje, što zaraz u krainie, mohuć paličyć, što heta napadzieńnie.
— Nu kali nam z žonkaj pačynajuć bić mašynu, ja ćviarozy, nijakich apaznavalnych znakaŭ niama, to što jašče zastavałasia rabić?
***
— Atrymlivajecca, što heta niejkija pacany biez formy? Nu, mianty, unutranyja vojski, śpiecnaz?
— Nu ŭ 12 nočy. Jany jechali na aŭtobusach, zaharadzili darohu i ŭsio. Vyjšli i pačali bić mašyny.
— Na tvaim miescy, słuchaj, što z advakatam, što biez advakata — heta *niecenzurna*.
***
— A jak ciabie złavili?
— Ja sprabavaŭ źjazdžać, razvaročvacca. Razumieješ, ja ŭciakaŭ ad hetych bandytaŭ. Ja raźviarnuŭsia, prajechaŭ niejkuju adlehłaść u šokavym stanie … Ja zajechaŭ u niejki dvor, tam znoŭ pačynajuć bić, vyciahnuli mianie. Pakazvali videarehistratary, a tak ja ničoha nie pamiataju. Pamiataju, jak vyciahvali. Ludzi kryčali *niecenzurna*, potym padniali mianie, stali pahražać. «Što ty narabiŭ, ty što, pjany?». Ja kažu, što nie. Advieźli na aśviedčańnie, tam 0,25 pramile akazałasia.
***
«Dalej dzielacca historyjami z žyćcia».
***
— Pryjechali daišniki, kab ja padpisaŭ pratakoł. … Ja skazaŭ, što ničoha padpisvać nie budu, bo ničoha nie pamiataju.
***
«Infarmacyja ŭtrymlivajecca ŭ zapisu niavyznačanych asob u kamiery. Na biełaruskaj movie idzie abmierkavańnie infarmacyi palityčnaha charaktaru».
***
— Nu kali samaje horšaje, što tabie daduć, to tam tabie *niecenzurna*… U ciabie ž nie było na mašynie bieła-čyrvonaha?
— Nie było ničoha.
— Nu tady atrymaješ chimiju. A tam abjaviać amnistyju. Ty ž raniej niesudzimy, heta plus vialiki. Pryznaješ. Ty ž nie skažaš, što jaho nie źbiŭ.
— Hučyć hołas sukamiernika na biełaruskaj movie: — «Atrymałasia, što najechaŭ… *nierazborliva*»
***
«Taksama ŭtrymlivajucca razmovy ab vybary advakata, ab śledčych dziejańniach z udziełam advakata. Ścierlikaŭ paviedamiŭ, što biez advakata admoviŭsia *nierazborliva*, spasyłajučysia na artykuł 27 Kanstytucyi».