Pratesty ŭ Jerevanie 20 lutaha.
«My zaklikajem kožny dzień pravodzić akcyi pratestu, mitynhi, zabastoŭki, aŭtaprabiehi — horad pavinien być paralizavany», — zajaviŭ na mitynhu ŭ Jerevanie kandydat na pasadu premjera ad apazicyi Vazhien Manukian.
Niahledziačy na śniehapad, u subotu, 20 lutaha, na zaklik abjadnanaj apazicyi i «Ruchu za vyratavańnie radzimy» na płošču Svabody ŭ Jerevanie pryjšli, pavodle dadzienych arhanizataraŭ, ad 15 da 18 tysiač čałaviek. Z zaklikami vyjści na vulicy ŭpieršyniu źviarnulisia da svaich prychilnikaŭ eks-prezidenty Armienii Robiert Kačaran i Sierž Sarhsian.
Z 9 listapada, kali premjer-ministr Armienii padpisaŭ sumiesnuju z Azierbajdžanam i Rasijaj zajavu ab spynieńni bajavych dziejańniaŭ u Nahornym Karabachu, ludzi damahajucca adstaŭki Nikoła Pašyniana i jahonaha ŭrada. Jany i siońnia ličać, što heta było zdradaj i patrabujuć nie tolki adstaŭki ŭrada, ale i pryciahnieńnia Pašyniana da kryminalnaj adkaznaści za «dziaržaŭnuju zdradu». «Armienija bieź Nikoła!», «Nikoł-zdradnik!» — skandujuć ludzi, jakija sabralisia na płoščy.
Vazhien Manukian zajaviŭ, što ŭ pieršuju čarhu nieabchodna «złamać aporu» ciapierašniaha ŭrada — siłavyja struktury i parłamient, a taksama pierakanać častku hramadstva, jakaja padtrymlivaje Pašyniana, u tym, što «ŭłady viaduć krainu da prorvy».
Apazicyja abviaściła pra svaju rašučaść damahčysia adstaŭki ŭrada i praviadzieńnia pazačarhovych vybaraŭ u parłamient. Pa słovach adnaho ź jaje lidaraŭ Išchana Sahatelana, «my nie spynimsia, ź siońniašniaha dnia Nikoł Pašynian i jaho ŭłada zabuduć pra spakoj».
U svaju čarhu, ułady nie ličać pratesty ŭ krainie «krytyčnymi» i praciahvajuć pracavać nad «darožnaj kartaj» Pašyniana «pa pieraadolvańni situacyi, jakaja stvaryłasia ŭ krainie, ustalavańniu stabilnaści i biaśpieki». U červieni hetaha hoda premjer źbirajecca vystupić sa spravazdačaj ab praviedzienaj pracy i tolki tady, z ulikam hramadskaj dumki, vyrašyć, što rabić dalej.
Siły pravaparadku ŭziali budynki ŭrada i parłamienta pad uzmocnienuju achovu. U centr horada ściahnutyja niekalki dziasiatkaŭ aŭtobusaŭ z palicejskimi i śpiecnazam, śpiectechnika.
Paśla mitynhu ŭdzielniki akcyi padzialilisia i šeściem pajšli błakavać centr stalicy. Na šerahu kirunkaŭ, u pryvatnaści na praśpiektach Maštoca i Bahramiana, ludziam udałosia pierakryć ruch transpartu, jon tut całkam paralizavany. Z nadychodam ciemry pratestoŭcy pierakryli ruch na płoščy Respubliki, dzie raźmieščany budynak urada. Rezidencyja premjer-ministra ŭziataja pad trajnoje kalco achovy.
Čas ad času palicyja patrabuje ad manifiestantaŭ spynić błakavańnie vulic i adnavić ruch transpartu. Adnak ludzi nie razychodziacca. Ich kolkaść na vulicach raście.
Nie abyšłosia biez bojek z palicyjaj. Niepadalok ad płoščy Svabody pamiž udzielnikami akcyi i prychilnikami Pašyniana adbyłasia bojka, adnak palicyi ŭdałosia raźvieści zavadataraŭ. Pavodle źviestak na 19.00 pa miascovym časie, zatrymanyja da saraka pratestoŭcaŭ.
