Hałoŭnym punktam zboru asudžanych staŭ «śpiecpryjomnik u Sacharavie». Heta Centr časovaha ŭtrymańnia zamiežnych hramadzian u vioscy Sacharava ŭ Novaj Maskvie. Zvyčajna tam siadziać zamiežniki ŭ čakańni departacyi, ale ciapier da ich dadalisia i niezadavolenyja ŭładaj maskvičy.
Sacharava, korpus śpiecpryjomnika. Fota: Michaił Džaparydze / TASS
Śpiecpryjomnik znachodzicca na terytoryi vialikaha šmatfunkcyjanalnaha mihracyjnaha centra, jaki adkryli ŭ 2015 hodzie.
Ale čamu maskvičoŭ raptam pačali zvazić u centr dla mihrantaŭ? Usio banalna: u inšych śpiecpryjomnikach rasijskaj stalicy prosta skončylisia miescy.
Ranicaj 2 lutaha la śpiecpryjomnika ŭ Sacharavie vystrailisia ŭ čarhu aŭtazaki z zatrymanymi.
«Uvieś hety čas prydumlali, jak raźmiaścić aryštantaŭ. Da siaredziny dnia ŭsie kamiery byli ŭkamplektavanyja. A la bramy śpiecpryjomnika stała vyrastać jašče adna čarha — heta svajaki i siabry, jakija pryjechali ŭ Sacharava ź pieradačami», — piša Novaja hazieta.
Praź vialikuju kolkaść svajakoŭ asudžanych čas pryjomu navat praciahnuli na dźvie hadziny.
Fota — Novaja hazieta
A nieŭzabavie internet zapoŭnili fotazdymki i navat videaroliki niepasredna z kamier.
Fota z telehram-kanała «Protiestnyj MHU»
Zdymki apublikavaŭ administratar kanała «Protiestnyj MHU»:
«Nas prosta pieraviali z aŭtobusa ŭ budynak, kab adpuścić kiroŭcu i supracoŭnikaŭ, jakija supravadžali nas. U 8-miascovaj kamiery na dvuchjarusnych mietaličnych łožkach biez matracaŭ raźmiaścilisia 28 čałaviek.
Z adździeła palicyi my vyjšli ŭ hadzinu dnia. Amal uvieś nastupny čas, za vyklučeńniem karotkaha pierapynku na sud, my praviali ŭ aŭtobusie: kala 16 hadzin. A 5-j ranicy nas pieraviali ŭ adnu z kamier Sacharava, praciahvajem čakać».
Administratar kanała Dźmitry Ivanoŭ rastłumačyŭ «Našaj Nivie», jak zmoh zrabić i apublikavać fotazdymki:
«Nas vyvieli z aŭtobusa, zaviali ŭ 8-miascovuju kamieru 28 čałaviek, u niekalkich susiednich kamierach było toje ž samaje. Supracoŭniki biehali pa kalidorach, razmaŭlali vyklučna matam, načalnik izalatara harłapaniŭ na kanvairaŭ i patrabavaŭ terminova znajści kamiery.
U takich umovach niemahčyma prakantralavać ničoha, nas prosta ŭčatyroch vyvieli z toj kamiery i pasadzili ŭ kamieru na čatyry miescy. Nas nie abšukali, nie aformili.
Siadzim u kamiery z usimi rečami, jak pryjechali.
Naohuł, ja razumieju, što kadry z Sacharava ź pierapoŭnienymi kamierami vonkava nahadvajuć toje, što vy bačyli ŭ Žodzinie i na Akreścina, ale staŭleńnie supracoŭnikaŭ tut zusim inšaje: u nas usia «žeść» dziejecca na vulicach i (časam) u adździełach palicyi, a ŭ śpiecpryjomnikach supracoŭniki dosyć vietlivyja i akuratnyja, ja nie viedaju nivodnaj historyi, kab tut kahości źbili».
Paśla zatrymanych pačali narešcie raskidvać pa kamierach.
Na fota sprava — Siarhiej Śmirnoŭ, hałoŭny redaktar «Miedyjazony». Jon atrymaŭ 25 sutak za repost žartaŭlivaha tvita, u jakim była data mitynhu. U vyniku, sudzili Śmirnova ŭ biełaruskim styli i pakarali… za ŭdzieł u mitynhu!
Cikava, što za fota z kamier aryštantaŭ nie pakarali, a naadvarot, palepšyli im umovy.
«Tolki što da nas prychodzili siabry hramadska-naziralnaj kamisii i kiraŭnictva izalatara. Jany zapatrabavali vydać nam matracy, tepciki, šampuń i vadu, na praciahu piaci chvilin usio źjaviłasia. Spadziajomsia, u inšych kamierach takaja ž situacyja, — piša admin kanała «Protiestnyj MHU». —
Načalstva izalatara vielmi začapiła publikacyja fatahrafij ź pierapoŭnienaj kamiery. Jany patłumačyli, što źmiaścili ŭsich u kamiery na čas afarmleńnia, kab nie trymać ludziej u aŭtazakach, dzie ŭmovy jašče horšyja. Ja sa svajho boku mahu skazać, što heta padobna da praŭdy. Supracoŭniki śpiecpryjomnika sapraŭdy nie nastrojeny da nas niehatyŭna. Źmiaščeńnie 28 čałaviek u 8-miascovuju kamieru vyhladaje žudasna, ale heta sapraŭdy lepš, čym kali b my da hetaha času byli ŭ aŭtazakach.
Ci značyć heta, što my nie majem ničoha suprać takich umoŭ? Viadoma, nie. Majem. Izalatar sutyknuŭsia z kałapsam — usich aryštavanych prosta niemahčyma było pryniać takim čynam, kab nie trymać ich u aŭtazakach abo pierapoŭnienych kamierach šmat hadzin. Takoj kolkaści aryštavanych być nie pavinna».
Umovy ŭ śpiecpryjomniku ciažkija, ale nieparaŭnalnyja z Akreścina. Naŭmysnych ździekaŭ — prynamsi pakul što — niama.
«U kamierach było horača. My ratavalisia ad duchaty, chavajučy batarei koŭdraj. Ścieny ŭ pakojach pakrytyja biełaj tynkoŭkaj z brudnavatymi kropielkami, padłoha bietonnaja, — raspaviadaŭ adzin z asudžanych partału Strelkamag. — Nielha skazać, što ramont zusim atas, ale kali my zajšli ŭ kamiery, to afihieli. Tualet-dzirka sa zmyvam raźmiaščajecca prosta ŭ kamiery. Sanvuzieł aharodžany ścienkaj kala 1,2 mietra ŭ vyšyniu, dźviarej tam niama. Duš u śpiecpryjomniku ahulny na pavierch, adrazu ŭ im mohuć mycca šeść čałaviek. Adčuvańni ad śpiecpryjomnika takija: pryjazdžaješ i afihievaješ. Potym rahočaš z pacanami: «Nu i zaniesła ž nas». Praz paru dzion užo zvykaješsia, ničoha nie razdražniaje. Zvykaješsia nie źviartać uvahu na ŭmovy, pabolš mieć znosiny, žartavać, čytać, pisać niešta i hulać u hulni».
Pry hetym umovy ŭ Sacharavie horšyja, čym u zvyčajnych maskoŭskich śpiecpryjomnikach, raskazaŭ «Našaj Nivie» juryst FBK Uładlen Łoś. Jon adbyvaŭ troje sutak u śpiecpryjomniku «Birulova-Zachodniaje».
«U Sacharavie kamiery na bolšuju kolkaść ludziej, łožki dvuchpaviarchovyja, sanitarnyja pryłady brudnyja», — adznačyŭ Łoś.
Taksama ŭ śpiecpryjomnikach Rasii isnuje norma, jakuju ciažka ŭjavić hramadzianinu Biełarusi. Štodnia asudžany maje prava na 15 chvilin karystańnia svaim mabilnym telefonam!
«Isnuje norma, što ty možaš mieć suviaź 15 chvilin na dzień. U roznych rehijonach pa-roznamu. U Pieciarburhu letaś možna było tolki zvaniłkaj karystacca biez fota i internetu. U Maskvie takich abmiežavańniaŭ niama, — kaža Uładlen Łoś. — Administracyja adrazu paśla špacyru dazvalaje atrymać telefon. Na špacyr vyvodziać pa kamierach. To-bok usie ludzi z adnoj kamiery karystajucca telefonami adnačasova.
Dla hetaha ludziej advodziać u asobny pakojčyk, zabirać mabilnik u kamieru nielha.
U maim śpiecpryjomniku heta byŭ pakoj niedzie try na try mietry. Ciabie tudy pryvodziać, tam stoł, kresła, razietka dla telefona. Na stale staić skrynia, dzie lažyć tvoj telefon u pakiecie. Siadaješ, biareš telefon, palicejski havoryć, što pačalisia 15 chvilin. Sam siadaje pobač ź dźviarami.
Palicejski siadzić niedzie u staroncy, ale niepasredna u telefon nie zahladvaje».
Na ranicu 3 lutaha ŭ Sacharaŭskim śpiecpryjomniku znachodziłasia 506 hramadzian Rasii, paviedamlaje siabra ANK Maryna Litvinovič, ź ich kala 90% apynulisia tam za mitynhi. Ale ž zatrymanych 31 studzienia ŭ Maskvie było nie mienš za 1400 čałaviek. Mahčyma, ich buduć nakiroŭvać adbyvać pakarańnie ŭ rehijony, piša Novaja hazieta.
