Praciahłyja daždžy ŭ Francyi pryviali da raźlivu Sieny adrazu ŭ niekalkich rehijonach krainy, u tym liku ŭ staličnym Il-de-Frans. Jak pieradaje TASS, u Paryžy zatoplenyja mnohija nabiarežnyja, u tym liku la sadu Ciuilry, Łuŭra i muzieja Orse.
U suviazi z pavyšeńniem uzroŭniu vady haradskija słužby prybrali z nabiarežnych pierasoŭnyja kafe, łaŭki i śmiećcievyja baki. Paryžanam, jakija pražyvajuć na baržach, rekamiendavana pierastavić u biaśpiečnaje miesca aŭto, skutery i rovary. Dostup da mnohich nabiarežnych pierakryty.
Uzrovień vady ŭ Sienie ŭ rajonie vakzała Aŭsterlic padniaŭsia ŭ niadzielu dniom da adznaki 3,78 mietra vyšej za ardynar. Pry hetym pik pavodki jašče nie projdzieny, papiaredžvajuć śpiecyjalisty. Pavodle prahnozaŭ, 1 lutaha ŭ siaredzinie dnia ŭzrovień raki padnimiecca da 4 mietraŭ.
Nieaficyjnaj škałoj niepahadzi dla paryžan słužyć znakamitaja piacimietrovaja fihura zuava (sałdata kałanijalnych vojskaŭ), ustalavanaja ŭ centry horada na adnoj z apor mosta Alma, jaki złučaje bierahi Sieny. Pad vadoj schavalisia stupaki kamiennaj statui. U 1910 hodzie, padčas najbujniejšaj pavodki XX stahodździa, zuaŭ praktyčna całkam syšoŭ pad vadu. Tady ŭzrovień Sieny pieravysiŭ adznaku ŭ 8,5 mietra, zatapiŭšy čverć stalicy.
Daždžy praciahvajucca ŭ krainie try tydni.
