U pieršy dzień suda było dapytana 18 śviedak: vykładčyki i studenty BDUIR, achoŭnik i baćki Arcioma. Pa ich słovach, zaniatki byli prypynienyja na 5-15 chvilin, ale pretenzijaŭ nichto nie maje da hetaha. Pavodle abvinavačvańnia, Arciom dziejničaŭ u hrupie asobaŭ — hetyja ludzi nieŭstanoŭlenyja, a śviedki dajuć roznyja pakazańni, kolki ludziej tam było. Arcioma Vinakurava mnohija paznali tolki na videa sa sprečkaj z dekanam BDUIR Leanidam Šylinam, jakoje studenty vykłali ŭ internet. Spravu razhladaje sudździa Maryna Fiodarava, paviedamlaje spring96.org.
Arciom Vinakuraŭ — student 3 kursa fakulteta kampjuternych sistem i sietak BDUIR. Pavodle źviestak MUS, 26 kastryčnika jon razam ź inšymi navučencami zajšoŭ u aŭdytoryju, dzie prachodziŭ zaniatak, i pačaŭ zaklikać da strajku. Paśla taho jak dekan fakulteta infarmacyjnych technałohij i kiravańnia Leanid Šylin zrabiŭ zaŭvahu studentam i paprasiŭ ich vyjści z aŭdytoryi, «u jaho adras pasypalisia abrazy i pahrozy». Arciom byŭ zatrymany ranicaj 27 kastryčnika, suprać jaho była raspačataja kryminalnaja sprava ab arhanizacyi i padrychtoŭcy dziejańniaŭ, jakija hruba parušajuć hramadski paradak (artykuł 342 Kryminalnaha kodeksa).
3 śniežnia Arciom byŭ pryznany pravaabaroncami palityčnym źniavolenym. Da suda Arciom utrymlivaŭsia ŭ SIZA ŭ Žodzinie.
Svaju vinu Vinakuraŭ pryznaŭ u poŭnym abjomie. Intaresy chłopca abaraniajuć advakaty Andrej Bałmakoŭ i Andrej Doŭnar.
Pieršaj siońnia dapytali vykładčycu z BDUIR. Jana raspaviała, što na jaje lekcyju 26 kastryčnika «ŭvarvaŭsia padsudny, a studenty akazvali jamu šumavuju padtrymku». Pa jaje słovach, u hrupie było kala 30 studentaŭ, jany zajšli ŭ aŭdytoryju z dvuch uvachodaŭ. Usio zaniała nie bolš za 10 chvilin. Vykładčyca raspaviadaje pra dziejańni Arcioma Vinakurava:
«Kryčaŭ, na moj pohlad, narychtavanyja łozunhi emacyjnaha nastroju, zaklikajučy da strajku, da jakoha zaklikała i Śviatłana Cichanoŭskaja».
Studenty jaho padtrymlivali: apładziravali, skandavali padrychtavanyja vyrazy. Ale vykładčyca dadała, što jana nie pamiataje šmat čaho, bo była ŭ šokavym stanie.
Tady jana spytała ŭ studentaŭ, niaŭžo Śviatłana Cichanoŭskaja suprać taho, kab studenty vyvučali historyju, ale Vinakuraŭ joj nie adkazaŭ. Pa jaho słovach, jana nie paśpieła vykłaści ŭvieś materyjał nie tolki z-za 10 chvilin, ale i z-za zvarotu da studentaŭ z temaj, nie źviazanaj ź lekcyjaj.
Vykładčyca padkreśliła na sudzie, što ŭvarvańnie Vinakurava pakinuła ŭražańnie na joj. Advakat zapytaŭ, ci niehatyŭnaje, na što vykładčyca skazała:
«Čamu? Heta było niečakanaściu, ja padychodziła da navučalnaha pracesu standartna: biez zabastovak i pravakacyj».
Arciom u zale suda paprasiŭ prabačeńnie ŭ vykładčycy za toje, što prynios niazručnaści joj.
Nastupnym dapytvajuć jašče adnu vykładčycu BDUIR, u jakoj 26 kastryčnika była lekcyja pa matematycy. Jana raspaviała, što na paru sapraŭdy zachodziła hrupa studentaŭ na 5-7 chvilinaŭ. Jana nie pamiataje, što kankretna jany kazali i ci była ŭ ich simvolika. Nie pamiataje jana, ci byŭ siarod ich Arciom Vinakuraŭ. Pa jaje słovach, heta paŭpłyvała na navučalny praces: «Dzieści kazała chutčej potym». Pa jaje słovach, sprečki nie było pamiž imi:
«Jany da mianie nie źviartalisia, a źviartalisia da studentaŭ. Potym vysłuchali mianie i ŭsio zrazumieli».
Nastupny śviedka — vykładčyk Alachnovič. Pa jaho słovach, u aŭdytoryju, dzie ŭ jaho byli zaniatki, kala 10-j hadziny zajšli studenty ŭ čornych maskach i skazali: «Chto suprać hvałtu — za mnoj». «I tyja, chto suprać hvałtu, pajšli za imi».
Hety vykładčyk zajaviŭ na sudzie, što zaniatki nie byli praviedzienyja da kanca:
«Ja liču, heta parušeńnie hramadskaha paradku».
Ale jon nie zmoh skazać, ci byŭ siarod toj hrupy studentaŭ Arciom Vinakuraŭ. Usie dziejańni zaniali 2-3 chviliny.
«U mianie skłałasia ŭražańnie, što jany byli hatovyja, voś pa-vajskovamu, pa-vajskovamu ŭstali i pajšli, to-bok jany byli hatovyja».
Na sudzie pa spravie Vinakurava taksama byŭ dapytany zahadčyk łabaratoryi Strakovič — kuratar hrupy BDUIR, dzie navučaŭsia Arciom. Jon acharaktaryzavaŭ Arcioma jak «studenta, nie samaha adstałaha, jak bolšaść studentaŭ, jaki mieŭ aŭtarytet siarod adnakurśnikaŭ».
Była dapytanaja i jašče adna studentka BDUIR Curo — adnahrupnica Arcioma, starasta hrupy. Jana apisała jaho jak dobrazyčlivavha čałavieka, jaki zaŭsiody dapamahaŭ inšym. 26 kastrčnika jana adsutničała na parach — daznałasia pra padziei taho dnia ź internetu.
U sudzie byli ahučanyja pakazańni jašče niekalkich studentak, jakija nie zmahli źjavicca na pasiadžeńnie. Na sudzie ŭ jakaści dokazaŭ byŭ prahledžany rolik kanfliktu dekana Leanida Šylina i Arcioma Vinakurava.
