«Liču, što sprava ŭ dačynieńni da mianie sfabrykavanaja, pakolki zvolniŭsia z orhanaŭ unutranych spraŭ pavodle svaich pierakanańniaŭ. Da 18 žniŭnia ja pracavaŭ načalnikam adździeła kryminalnaha vyšuku Zavodskaha RUUS. Paśla padziej u žniŭni zrazumieŭ, što pracavać dalej nie zmahu zhodna z maralnymi pryncypami. Adkryta vykazaŭ svaju hramadzianskuju pazicyju, u vieraśni vykłaŭ fota (milicejskaj formy na fonie śmietnicy — zaŭvaha Red.).
Miarkuju, što supracoŭniki USB vyrašyli mianie pravučyć, pakazać inšym supracoŭnikam, što nie varta zvalniacca, bo voś, što ź imi budzie — tak źjaviłasia hetaja sprava. Mianie trymali 27 sutak (u izalatary — zaŭvaha Red.), ad mianie patrabavali pryznać, što ja sprabavaŭ pradać infarmacyju pra supracoŭnikaŭ milicyi, ale ja admoviŭsia. Trymali ŭ niečałaviečych umovach, 25 sutak pravioŭ u karcary bieź lekaŭ i miedycynskaj dapamohi. Tym časam z doma zabrali moj noŭtbuk, jon nie byŭ naležnym čynam aformleny pry pieratrusie, u žonki spytali parol, to-bok supracoŭniki pieršapačatkova mieli dostup da kampjutara, mahli zrabić ź im usio, što zaŭhodna».
Kułakoŭskaha abvinavačvajuć u abrazie apieratyŭnaha supracoŭnika USB pa proźviščy Smalar (art. 369 KK, karajecca hramadskimi pracami, abo štrafam, abo papraŭčymi rabotami na termin da dvuch hadoŭ, abo aryštam ci abmiežavańniem voli na termin da troch hadoŭ). Pa viersii śledstva, Kułakoŭski raźmiaściŭ haniebny kamientar pad fota dziejnaha milicyjaniera ŭ supołcy «Karniki Biełarusi». Prakuror začytaŭ, što kamientar supiarečyć ahulnačałaviečaj marali.
Śledčy cikaviŭsia ŭ Kułakoŭskaha i jaho žonki tatuiroŭkami byłoha milicyjanta i parolem ad kampjutara — heta spałučeńnie ličbaŭ «adzin», «čatyry» i dva razy pa «vosiem». Takoje spałučeńnie mohuć vykarystoŭvać prychilniki nieanacysckaj ideałohii, adnak sama pa sabie ličba jak data, biez udakładnieńniaŭ, nie źjaŭlajecca zabaronienaj jak ekstremiscki materyjał.
«U mianie jość tatuiroŭki kielckich skandynaŭskich simvałaŭ, nie viedaju, paralel z čym sprabavali znajści, — patłumačyŭ abvinavačany ŭ sudzie. — Parol ad noŭtbuka taki, tamu što 1 krasavika 88-ha hoda baćka ŭpieršyniu advioz mianie ŭ Maskvu, heta było zapaminalna».
Upraŭleńnie ŭłasnaj biaśpieki pravaachoŭnych orhanaŭ detalova vyvučaje pohlady dziejnych supracoŭnikaŭ, adnak padčas słužby pytańniaŭ da Kułakoŭskaha z hetaj nahody nie ŭźnikała.
Paciarpieły Smalar na pieršaje sudovaje pasiadžeńnie nie źjaviŭsia, dasłaŭ apaviaščeńnie, što chvareje i paprasiŭ razhladać spravu bieź jaho. Advakat Natalla Tarasiuk prasiła adkłaści pasiadžeńnie da momantu, pakul toj papravicca, adnak praces usio ž praciahnuŭsia. Taksama adzin sa śviedkaŭ, ukazana proźvišča Kalinoŭski, prosić nie vyklikać jaho ŭ sud, bo ličyć, što jość pahroza jaho biaśpiecy. Advakat była suprać, ale sud zadavoliŭ prośbu.
Tarasiuk źviarnuła ŭvahu na toje, što padčas pieratrusu ŭ kvatery Kułakoŭskaha zabrali kampjutar, ale nie zapakavali jaho naležnym čynam u pakiet, tamu jość vierahodnaść, što majučy parol, na kampjutar mahli ŭnieści peŭnuju infarmacyju, jakoj raniej nie było. Da materyjałaŭ dałučana mierkavańnie prahramista, jaki padrabiazna apisvaje, što zrabić heta mahčyma i inšaj dataj. Akramia taho, pakazańni adnaho z supracoŭnikaŭ USB pa kryminalnaj spravie adroźnivajucca ad źviestak, jaki toj padaŭ pa administracyjnaj spravie ŭ dačynieńni da Dźmitryja Kułakoŭskaha.
Paśla vyzvaleńnia ź IČU były milicyjant byŭ doma, pa vystaŭlenym abvinavačvańni zatrymać jaho nie mahli (pad vartu mohuć uziać, kali pahražaje zvyš dvuch hadoŭ pazbaŭleńnia voli). U śniežni 2020 hoda Dźmitryj pasprabavaŭ vyjechać ź Biełarusi, choć jamu byŭ časova abmiežavany vyjezd u suviazi z kryminalnaj spravaj. Jaho zatrymali na pamiežnym punkcie i paśla hetaha ŭžo ŭziali pad vartu.
