Advakat pa spravie Kaciaryny Andrejevaj znachodzicca pad padpiskaj ab nierazhałošvańni i nie maje prava paviedamić navat svajakam, na jakoj stadyi znachodzicca sprava žurnalistki. Adnak siońnia Ihar Iljaš atrymaŭ list ad Kaciaryny ad 1 studzienia 2021 hoda. U im žurnalistka piša, što ŭ chutkim časie čakaje etapavańnia ŭ Miensk.
«Z kantekstu zrazumieła, što havorka idzie pra etapavańnie na sud. Heta całkam łahična: Kaciarynu pieravodzili ŭ Žodzina na čas śledstva. Pakolki jana maje padstavy raźličvać na etapavańnie ŭ Miensk, značyć śledstva było zavieršana i treba čakać, što nieŭzabavie budzie sud», — kaža Ihar Iljaš.
Kali moža adbycca etapavańnie i sud — nie viadoma. Adnak Kaciaryna piša ŭ liście nakont budučaha sudovaha pracesu:
«Prahnozaŭ nie rablu navat. Hatovaja da ŭsiaho. Ździvić davoli składana mianie ciapier».
Žurnalistki «Biełsata» Kaciaryna Andrejeva i Darja Čulcova zastajucca za kratami z 15 listapada — jany byli zatrymanyja za strym, dzie pakazali žorstki razhon akcyi pamiaci Ramana Bandarenki i razbureńnie siłavikami narodnaha miemaryjału. Kaciarynie i Darji vystaŭlena abvinavačvańnie pavodle č. 1 art. 342 («Arhanizacyja i padrychtoŭka dziejańniaŭ, što hruba parušajuć hramadski paradak»). Pravaabaroncy pryznali ich palitviaźniami.
