Minski hadzińnikavy zavod «Łuč» vypuściŭ limitavanuju kalekcyju hadzińnikaŭ «Asoba». Jana pryśviečana adnamu z zasnavalnikaŭ biełaruskaha prafiesijnaha teatra, akcioru i režysioru Fłaryjanu Ždanoviču (1884—1937).
Novaja kalekcyja naličvaje 100 štuk. U kožnaha jość svoj paradkavy numar, jon źmieščany z advarotnaha boku hadzińnika. Adzin asobnik zavod pieradaŭ u jakaści ekspanata ŭ Muziej historyi teatralnaj i muzyčnaj kultury — tam jość asobnaja ekspazicyja, pryśviečanaja Ždanoviču.
Cyfierbłat vykanany ŭ kolery zasłony Kupałaŭskaha teatra — hłybokim bardovym. Tak dyzajniery vyrašyli źviazać historyju i sučasnaść biełaruskaha teatra.
Mienavita pad kiraŭnictvam Fłaryjana Ždanoviča ŭ 1920 hodzie adkryŭsia Biełaruski dziaržaŭny teatr (Kupałaŭski), dzie jon byŭ mastackim kiraŭnikom i akcioram.
Malunak teatralnaj zasłony na hadzińniku ŭziaty z vokładki knihi, dzie ŭpieršyniu była apublikavana pjesa Janki Kupały «Paŭlinka», pastaŭlenaja Ždanovičam. Cyfierbłat taksama ŭpryhožvajuć rymskija ličby, teatralny binokl i maski.
— Kalekcyja «Asoba» stvorana, kab nahadać biełarusam pra imiony dziejačaŭ kultury i mastactva, jakija akazalisia niezasłužana zabytymi. Hadzińniki, pryśviečanyja Fłaryjanu Ždanoviču, užo druhija z kalekcyi «Asoba». U śniežni 2019 hoda zavod vypuściŭ abmiežavanuju sieryju hadzińnikaŭ pa matyvach rabot samabytnaj biełaruskaj mastački Aleny Kiš, — raskazvaje Ivan Kraŭčenia, art-dyrektar Minskaha hadzińnikavaha zavoda.
