Na nastupnym tydni Ministerstva adukacyi płanuje prezientavać nacyjanalny elektronny resurs, jaki dazvalaje pravodzić školnyja zaniatki ŭ dystancyjnaj formie, paviedamlajuć «Minsk-Naviny».
Mierkavałasia, što płatforma na ŭsiu moc zapracuje ŭviesnu, ale niešta nie spracavała.
U druhuju chvalu zachvorvalnaść na COVID-19 jašče vyšejšaja. Pavodle źviestak na 9 śniežnia, znoŭ vyjaŭlena bolš za 1850 novych vypadkaŭ. Tamu hetym razam, miarkujučy pa ŭsim, razhladajecca varyjant pieravodu školnikaŭ na dystancyjnaje navučańnie.
Prahnozy miedykaŭ da epidemičnaj abstanoŭki ŭ śviecie pakul niesuciašalnyja. Tamu całkam imavierna, što adukacyjnaja płatforma spatrebicca školnikam užo ŭ treciaj čverci.
Na płatformie płanujecca raźmiaścić sotni videaŭrokaŭ. Pryčym u pieršuju čarhu ŭ bazu zapampoŭvajucca materyjały dla treciaj čverci. Praciahłaść uroka dla małodšych kłasaŭ budzie 5-7 chvilin, dla 5-8-ch — 10-12 chvilin, dla 9-11-ch — 15-17 chvilin.
«Padčas prahladu vučniu nieabchodna budzie stavić rolik na paŭzu, vykonvać peŭnyja zadańni, a zatym znoŭ jaho zapuskać. Naprykład, buduć hučać zakliki adkryć sšytak, rašyć prykład, i tolki paśla hetaha možna daviedacca pravilny adkaz i paraŭnać sa svaim vynikam», — raskazała pra toje, jak heta budzie pracavać, namieśnica dyrektara Nacyjanalnaha instytuta adukacyi Ludmiła Ramanoŭskaja.
Da ŭroka budzie prykładacca testavaje zadańnie. Akramia taho miarkujecca, što z dapamohaj płatformy nastaŭniki zmohuć pravodzić i anłajn-uroki pa pryncypie videakanfierencyi.
