Alaksandr Łukašenka siońnia na pasiadžeńni abłasnoha štaba pa pytańniach procidziejańnia karanavirusnaj infiekcyi ŭ Viciebskaj vobłaści vykazaŭsia pra «fejki» adnosna jaho vizitu ŭ Viciebsk i stanu spraŭ u balnicach.
«Nie paśpieŭ ja pryjechać da vas u Viciebskuju vobłaść, jany napisali, što (mnie navat niajomka čytać) «desant čekistaŭ vysadziŭsia zahadzia». Nakolki ja infarmavany, usie čekisty na rabočych miescach. Ja ranicaj havaryŭ ź Ivanam Ciercielem — usie na rabočych miescach», — adznačyŭ Alaksandr Łukašenka.
Łukašenka padkreśliŭ, što pierad jaho vizitam u toj ci inšy horad supracoŭniki KDB nie pryciahvajucca da arhanizacyi mierapryjemstva. Pytańniami biaśpieki zajmajecca adpaviednaja struktura — Słužba biaśpieki prezidenta. Heta ahulnasuśvietnaja praktyka.
«Dalej pišuć: «Vidać, budzie raskazvać, jak usio ŭ krainie dobra i «karonu» my pieramožam. Cikava, što adkažuć jamu miedycynskija siostry i sanitarki, jakija ŭ karotkich pierapynkach padčas dziažurstva śpiać na padłozie?» Słuchajcie, dzie padčas dziažurstva miedsiastra abo doktar śpić naohuł? Hłupstva niesuśvietnaje. Dziažurstva na toje i jość dziažurstva, kab nie spać», — źviarnuŭ uvahu palityk.
Kamientujučy «fejki» pra niedachop adnarazovych srodkaŭ indyvidualnaj achovy, z-za čaho ich davodzicca daktaram dezynficyravać i nasić dalej, Alaksandr Łukašenka zajaviŭ, što ŭ krainie dastatkova SIA.
Sam Łukašenka pry vizitach va ŭstanovy achovy zdaroŭja štoraz nadziavaje adzin i toj ža miedycynski kaścium. «Mnie napiaredadni pryjezdu nie šyjuć chałat, štany, majku, šapačku. Ich u Minsku ŭ balnicy dezynficyrujuć, i ja znoŭ ich nadziavaju, — raskazaŭ jon. — Ale ja nie viedaju, kab adnarazovyja srodki indyvidualnaj achovy niechta vykarystoŭvaŭ šmat razoŭ. U nas hetaha dabra dastatkova».
U Telegram-kanałach taksama zapeŭnivajuć, što ŭ balnicach niama vyraznaha padziełu na «čyrvonuju» i čystuju zony. Heta poŭnaja chłuśnia, padkreśliŭ Alaksandr Łukašenka. «Ja ŭ čystaj zonie razam z vami pieraapranaŭsia, zajšoŭ u šluz, i tam napisana: «Čyrvonaja zona». Ja nadzieŭ hety «namordnik» na nos i pajšoŭ dalej. Vyjšaŭ z zony, šluz — «čystaja zona», — adznačyŭ palityk.
