1 listapada
Studenta 4-ha kursa BDUIR Jana Sałanoviča asudzili ŭžo na 71 sutki administracyjnaha aryštu zapar pa piaci epizodach: maci miarkuje, što ahułam hety termin moža być jašče bolšym, piša spring96.org.
«Jak mnohija, chto nie zhodny z tym, što adbyvajecca ŭ našaj krainie, jon vychodziŭ na mirnyja akcyi pratestu, — raspaviadaje maci Jana Volha. — Nijakich supraćzakonnych dziejańniaŭ jon nie ździajśniaŭ (zrešty, jak i ŭsie tyja, chto mirna hulaje). 1 listapada majho syna zatrymali na niadzielnym mirnym maršy ŭ Kurapaty, pa maich źviestkach, advieźli ŭ Partyzanskaje RUUS. Tam jaho dapytvali, napeŭna, akazvali niejki cisk i ŭ vyniku
jon nibyta pryznaŭsia ŭ 15 epizodach udziełu ŭ mitynhach za žnivień, vierasień i kastryčnik 2020 hoda. Adtul jaho dastavili na Akreścina — i tut pačałosia prosta piekła, jakoje ciahniecca da hetaha času».
Ahułam Jan Sałanovič atrymaŭ 71 sutki administracyjnaha aryštu pa piaci epizodach: 12 sutak jamu pryznačyli 2 listapada, 15 sutak — 5 listapada, 15 sutak — 10 listapada, 15 sutak — 18 listapada, 14 sutak — 26 listapada.
Volha miarkuje, što Jana čakajuć jašče čatyry sudy, tamu ahułam jaje syn moža atrymać jašče bolš.
«U spravach nie majecca nijakich dokazaŭ, a tolki, miarkuju, vybityja ŭ majho syna pryznańni ab udziele ŭ akcyjach pratestu ŭ vieraśni-kastryčniku 2020 hoda, — kaža jana. — Moj syn śćviardžaŭ, što jon maje kanstytucyjnaje prava na vykazvańnie svajho mierkavańnia jak čałaviek i hramadzianin. Adnak u sudździaŭ — svajo mierkavańnie, nasupierak usim mažlivym i niemažlivym zakonam našaj krainy. Moj syn moža prosta nie vytrymać. Jon užo atrymaŭ 71 sutki administracyjnaha aryštu, a napieradzie jašče moža być 45 sutak. Usiaho 117 sutak — mahčyma, u karcary. Jon moža vyjści na volu tolki ŭ sakaviku 2021 hoda».
