Dva tydni tamu pisali pra maładoha nastaŭnika matematyki i infarmatyki Alaksandra Krušava, jaki 26 kastryčnika syšoŭ u adnadzionny strajk, a paźniej źviarnuŭsia da biełarusaŭ u advažnym videaroliku. U vyniku piedahoh byŭ zvolnieny pa artykule. Učora jon atrymaŭ list, u jakim jaho abaviazvajuć viarnuć hrošy za metavaje navučańnie ŭ VNU. Alaksandr žyvie ŭ maleńkim ahraharadku Dobraja ŭ Mahiloŭskaj vobłaści. Znajści pracu jamu pakul nie ŭdałosia. Žonka ŭ dekrecie, a doma — dvoje maleńkich dziaciej, piša Rebenok.by.
My razmaŭlali z Alaksandram Krušavym paśla taho, jak jaho zvolnili sa škoły. Chłopiec trymaŭsia badziora, byŭ upeŭnieny, što biez pracy nie zastaniecca. I nikolki nie škadavaŭ ni ab strajku, ni ab zapisie videa, na jakim razam z kaleham asudziŭ hvałt i pieraśled za hramadzianskuju pazicyju.
Tady Alaksandr raspaviadaŭ, što maŭčać jamu nie dazvoliła sumleńnie i što abureńnie kiraŭnictva było čakana, ale zvalnieńnie pa artykule ŭsio ž stała siurpryzam:
«Ja zahadzia papiaredziŭ načalstva ab tym, što 26 kastryčnika nie vyjdu na pracu ŭ znak salidarnaści sa strajkoŭcami. Na nastupny dzień užo byŭ u kłasie: vučni nie pavinny adstavać pa pradmiecie, — kazaŭ Alaksandr. — Dzieści praz tydzień dyrektar pastaviła mianie pierad faktam: ja nie prosta zvolnieny, a jašče i pa artykule za prahuł».
Situacyju pahoršyła toje, što Alaksandr — metavik. Heta značyć, što jon pastupiŭ u VNU na biudžet pa metavym nakiravańni, pa-za ahulnym konkursam. Paśla vučoby jon pavinien byŭ adpracavać u jakaści abaviazkovaha raźmierkavańnia nie standartnyja dva hady, a piać. Vykanać hetu ŭmovu, jak my viedajem, nastaŭnik nie zmoh.
I zaraz u adpaviednaści z zakanadaŭstvam Alaksandr Krušaŭ pavinien vypłacić hrošy, zatračanyja na jaho navučańnie ŭ Mahiloŭskim dziaržuniviersitecie. Termin vypłaty — paŭhoda (punkty 5,7,8 pastanovy Saŭmina № 821 ad 22.06.2011). Z ulikam užo adpracavanaha času nastaŭniku naličyli 9 375 rubloŭ. Novuju pracu były nastaŭnik pakul nie znajšoŭ.
Paśla historyi sa zvalnieńniem uładkavacca pa śpiecyjalnaści akazałasia ciažka. Źjazdžać z rajona Alaksandru nie chaciełasia b (jon vielmi lubić małuju radzimu), tamu ciapier šukaje vakansii prahramista na dystancyjcy. Jak budzie kampiensavać niepadjomnuju dla siamji sumu, nastaŭnik pakul nie viedaje.
— U liście skazana, što doŭh treba pahasić na praciahu paŭhoda. Vielmi spadziajusia, što za hety čas niešta źmienicca i ja znajdu pracu. U mianie i majomaści niama, jakuju, u vypadku čaho, možna było b kanfiskavać za daŭhi. I što tady — pasadziać? — razvažaje Alaksandr. — Karaciej, što-niebudź prydumaju.
Kali vy chočacie dapamahčy Alaksandru Krušavu z pošukam pracy, napišycie na poštu [email protected]
