Fota Nadziei Bužan
Staršynia Tavarystva biełaruskaj movy raspaviała «Narodnaj Voli» pra toje, jak apynułasia ŭ balnicy i jak pačuvajecca siońnia.
Ja ŭžo doma, bo nie baču vialikaha sensu lažać u balnicy, — kaža Alena Mikałajeŭna. — Dziakuj Bohu, zapaleńnia lohkich niama, ale choć dyjahnostyku zrabili. Mnohija ludzi siońnia naohuł nie viedajuć, ci chvoryja jany, bo treba prykłaści dosyć vialikija namahańni, kab prajści teściravańnie ci zrabić kampjutarnuju tamahrafiju.
— Kali ŭ vas źjavilisia pieršyja simptomy?
— Na minułym tydni niejak adčuła siabie nie vielmi dobra, dumała, što heta zvyčajnaja prastuda. Ale ŭžo na nastupny dzień pračnułasia a 6-j ranicy i straciła prytomnaść. Dzieci vyklikali chutkuju, miedyki, što pryjechali, vyśvietlili, što ŭ mianie nizki ŭzrovień kisłarodu ŭ kryvi.
Była tempieratura bolš za 37 hradusaŭ, pavieźli ŭ balnicu. Daktary skazali: infiekcyja jość, ale lohkija čystyja. Adnym słovam, chvaroba praciakaje nie ŭ ciažkaj formie.
U toj ža čas ekspres-analiz pakazaŭ, što ŭ mianie ŭžo jość antycieły, chacia mazok na COVID-19 daŭ stanoŭčy vynik.
— Jak prachodziła lačeńnie ŭ balnicy?
— Nakolki ja zrazumieła, ciapier u balnicach pry lačeńni karanavirusa ŭžo pierastali davać antybijotyki. Prynamsi mnie tolki pryznačali ŭkoły dla razredžvańnia kryvi, treba było šmat pić vady, kab nie było suchaści, i prasili spać na žyvacie.
Uvohule, ciapier, kali traplaješ u balnicu ŭ ciažkim stanie (naprykład, paćviardžajecca pnieŭmanija), to 10 dzion lečać u adnoj balnicy, a dalečvacca adpraŭlajuć u inšuju. Ja była ŭ Balnicy chutkaj dapamohi, i adtul niekatorych chvorych nakiroŭvali ŭ 11-ju balnicu, kali tam byli miescy. Kali nie było, prapanoŭvali špital dla vieteranaŭ.
Ale kali pnieŭmanii niama, to niedzie tydzień čałavieka trymajuć pad nazirańniem u balnicy (praviarajuć tempieraturu, kantralujuć kisłarod), a zatym možna praciahvać lačeńnie doma.
— Zaraz u balnicach jość prablema z raźmiaščeńniem chvorych na karanavirus?
— Dumaju, što dla kožnaj balnicy vyznačana strohaja kolkaść miescaŭ dla chvorych na COVID-19, ale vidavočna, što napłyŭ zachvarełych jość. Nie ŭsie navat i traplajuć u balnicy, ale mnohija z tych, u kaho lohkaja forma, i sami tudy nie imknucca.
Zaŭvažyła taksama, što mnohija traplajuć u lakarni paśla taho, jak vyklikajuć chutkuju, bo z paliklinik tudy redka adpraŭlajuć.
— Doma taksama praciahvajecie lačeńnie?
— Tak, mnie vypisali peŭnyja leki dla razredžvańnia kryvi, ich patrebna pić kala paŭtara miesiaca.
— Ci prymali vy ŭsie miery pieraściarohi da taho, jak zachvareli na karanavirus?
— Biezumoŭna. Na pracy, u Instytucie movaznaŭstva Nacyjanalnaj akademii navuk, staralisia dystancyravacca, nie pierasiakacca adno z adnym. Byli, naturalna, zachvarełyja i ŭ našaj ustanovie, ale ja ź imi nie kantaktavała.
Pamiaškańnie pastajanna pravietryvali, masku ja zaŭsiody nasiła ŭ mahazinach i hramadskim transparcie, ale zachvareć možna absalutna ŭ lubym miescy. Sam nie budzieš viedać, dzie heta zdarycca.
— Jak ciapier siabie adčuvajecie?
— Słabaść u arhaniźmie, tamu niejkaj aktyŭnaj pracaj starajusia nie zajmacca. I pa viečarach śpinu vielmi krucić, tamu, vidać, treba rabić ukoły, kab źniać bol. Inakš spać prosta niemahčyma.
