Ministr zamiežnych spraŭ Biełarusi Uładzimir Makiej zajaviŭ, što zakliki da ekanamičnych sankcyj, jakija hučać ad apanientaŭ ułady źjaŭlajucca vialikaj niebiaśpiekaj dla dziaržaŭnaści Biełarusi, piša Tut.by.
Fota Nadziei Bužan
— Hetyja zakliki da ekanamičnych sankcyj u maim razumieńni nie prosta vialikaje hłupstva — heta vialikaja niebiaśpieka dla dziaržaŭnaści Biełarusi ŭ cełym. I kali chto-niebudź dumaje, što heta pryniasie karyść, to jon hłyboka pamylajecca. Viadoma ž, my budziem razmaŭlać z našymi zachodnimi partniorami ŭ hetym płanie. Mnie zdajecca, tam isnuje bolš razumieńnia adnosna taho, ci varta iści na padobnyja miery — na ŭviadzieńnie ekanamičnych sankcyj suprać Biełarusi. Ale chaču skazać: kali chto-niebudź choča pažaru ŭ hetym rehijonie, to my, viadoma ž, znojdziem, čym adkazać inicyjataram padobnaha rodu krokaŭ. I voś tady ŭžo budzie horača i vakoł Biełarusi, skažam tak, — zajaviŭ Makiej u intervju telekanału «Biełaruś 1», stenahrama jakoha apublikavana na sajcie MZS.
Kiraŭnik źniešniepalityčnaha viedamstva zapeŭniŭ, što siońnia abmiarkoŭvajucca miery ŭ adkaz Biełarusi na hetyja kroki.
— Kali, spadziajusia, što da hetaha nie dojdzie, ale kali kamuści zachočacca raspačać takoha kštałtu kroki, to ŭ nas jość dastatkovy nabor srodkaŭ, jaki dazvolić nam adekvatna adreahavać na mahčymyja ekanamičnyja restryktyŭnyja miery ŭ dačynieńni da Biełarusi.
Heta i metazhodnaść i pierśpiektyvy našaha supracoŭnictva ź Jeŭrapiejskaj kamisijaj i Jeŭrapiejskim sajuzam pa pytańniach atamnaj enierhietyki, pa ahulnaj baraćbie ź nielehalnaj imihracyjaj, z transhraničnaj złačynnaściu, z kantrabandaj narkotykaŭ i hetak dalej tamu padobnaje.
My zaraz pracujem nad dakumientam u mytnaj śfiery, dzie majecca taksama šerah adčuvalnych pytańniaŭ. Treba pahladzieć na heta. Pahladzim na šerah prahram u humanitarnaj śfiery, jaki realizujecca tut zamiežnymi dziaržavami i niaŭradavymi arhanizacyjami, i šerah adukacyjnych prahram. U cełym nabor srodkaŭ i mietadaŭ dosyć vialiki, ale nam nie chaciełasia b, jašče raz padkreślu, źviartacca da hetaha. Spadziajusia, što zdarovy sens pieramoža, i ni ŭ kaho nie źjavicca žadańnie vybudoŭvać novyja bierlinskija ścieny ŭ dadzienaj situacyi — - skazaŭ Makiej.
Ministr nahadaŭ, što na pačatkovym etapie apazicyja i siabry Kaardynacyjnaj rady kazali pra toje, što vystupajuć za ŭzmacnieńnie žorstkaści piersanalnych sankcyj, ale ni ŭ jakaj miery nie za ekanamičnyja sankcyi.
— Da hetaha kazali, što pasprabujuć zrabić tak, kab nie było drenna narodu, zvyčajnamu čałavieku. Siońnia ŭžo pra hety narod i zvyčajnaha čałavieka pačynajuć pastupova zabyvać — adznačyŭ Makiej.
Da hetaha času ŭ Jeŭrasajuzie padkreślivali, što nie chočuć uvodzić ekanamičnyja sankcyi, kab nie nanieści škodu šarahovym biełarusam i narodnaj haspadarcy krainy. Adnak žorstkaść biełaruskich uładaŭ pa adnosinach da pratestoŭcaŭ i hibiel Ramana Bandarenki zaachvocili ES źmianić svoj padychod.
Ciapier abmiarkoŭvajucca kropkavyja sankcyi suprać kankretnych biełaruskich kampanij, tak zvanych sponsaraŭ dziejnaha režymu. Jeŭrapiejskim kampanijam i fizičnym asobam budzie zabaroniena mieć suviazi ź biełaruskimi firmami z «čornaha» śpisu. Ź imi nielha budzie ni handlavać, ni zaklučać ździełki, ni inviestavać u ich.
