Fota: NASA.
Karabiel «Drehan» kampanii Iłana Maska SpaceX z čatyrma astranaŭtami na borcie startavaŭ z kasmadroma NASA ŭ Kaśmičnym centry imia Kienedzi na mysie Kanavierał u Fłarydzie. Heta druhi piłatavany palot karabla da Mižnarodnaj kaśmičnaj stancyi i pieršaja rehularnaja misija, piša VVS.
Pieršapačatkova start pavinien byŭ adbycca 14 listapada, ale jaho daviałosia adkłaści praź vielmi vietranaje nadvorje.
U składzie ekipaža — čatyry čałavieki, u tym liku try astranaŭty NASA i pradstaŭnik ahienctva aerakaśmičnych daśledavańniaŭ Japonii.
Astranaŭty praviaduć na MKS kala šaści miesiacaŭ.
Minuły zapusk «Drehana» ŭ kancy maja hetaha hoda byŭ pieršaj piłatavanaj kaśmičnaj misijaj, zapuščanaj z terytoryi ZŠA za dzieviać hadoŭ. Apošni raz «Šatł» uźlacieŭ z amierykanskaha kasmadroma ŭ 2011 hodzie, i z tych časoŭ dla dastaŭki astranaŭtaŭ na arbitu NASA była vymušanaja źviartacca da pasłuh «Raskosmasa».
Ciapierašni zapusk dla NASA zamacoŭvaje kančatkovy pierachod da novaj madeli pracy — zakupki pasłuh pa transparciroŭcy astranaŭtaŭ u kosmas u pryvatnych padradčykaŭ. Staraja madel — vałodańnie i apieravańnie ŭłasnym abstalavańniem, jak było z «Šatłami», — sychodzić u minułaje.
Košt kantraktaŭ, padpisanych SpaceX i NASA na vyprabavańni i paloty na «kaśmičnych taksi», składaje bolš za 3 młrd dalaraŭ. Pahadnieńnie praduhledžvaje šeść «zvyčajnych» palotaŭ, i ciapierašni zapusk — pieršy ź ich.
U NASA kažuć, što praca z subpadradčykam aščadziła ahienctvu miljardy dalaraŭ, jakija buduć vydatkavanyja na prajekty, źviazanyja ź Miesiacam i Marsam. Da 2024 hodzie ahienctva raźličvaje zapuścić na Miesiac maštabnuju piłatavanuju misiju.
