Usiu noč na «płoščy Pieramien», dzie ŭtvaryŭsia narodny miemaryjał u honar zabitaha miascovaha žychara Ramana Bandarenki, dziažuryli nieabyjakavyja minčuki. Niahledziačy na niespryjalnyja ŭmovy nadvorja, kala 50 čałaviek prastajali la stychijnaha pomnika da samaj ranicy. Płanujecca, što varta budzie kruhłasutkavaj, voś tut možna adsočvać aktualny stan narodnaha dziažurstva.
«Płošča Pieramien» — narodnaja nazva dvara ŭ Minsku, raźmieščanaha na skryžavańni vulic Čarviakova, Kachoŭskaj i Smorhaŭskaha traktu, utvaryłasia stychijna ŭ žniŭni 2020 hoda, padčas pratestaŭ paśla vybaraŭ. Paśla viestki pra śmierć miascovaha žychara Ramana Bandarenki 12 listapada ludzi pačali stychijna ściakacca da płoščy Pieramien, kab uskłaści kvietki i zapalić łampadki.
