Načalnik adździeła kadraŭ chołdynhu BiełOMA Jaŭhien Ihnatčyk paćvierdziŭ, što za tydzień było zvolniena bolš za 15 čałaviek. Balšynia «pa zhodzie bakoŭ», dva čałavieki pa artykule 42 Pracoŭnaha kodeksu — pa inicyjatyvie najmalnika. Zvolnienyja ličać, što jany paciarpieli za svaju pazycyju, piša «Svaboda».
Adkryta vykazvać svaju pazycyju niekatoryja pracaŭniki zavoda imia Vaviłava pačali jašče ŭ žniŭni. U abiedzieny pierapynak jany abmiarkoŭvali sytuacyju, pisali zvaroty va ŭsie orhany ŭłady z patrabavańniem spynić u krainie hvałt, navat pryhrazili strajkam. U žniŭni rabočyja BiełOMA vychodzili na pikiet da telecentru.
«Z nami sprabavała pravodzić hutarki kiraŭnictva zavodu. Z kožnym asobna razmaŭlali. Vyklikali paasobku i ŭ RUUS, chacia što niezakonnaha my zrabili? Napisali ŭ orhany ŭłady listy. Adkazaŭ nie atrymali, zdajecca, była adna adpiska. 26 kastryčnika, kali byŭ abvieščany ahulnanacyjanalny strajk, my taksama sabralisia na płoščy na terytoryi zavodu ŭ abiedzieny pierapynak, ale zaniali jašče 40 chvilin pracoŭnaha času. Chacieli paśla pracy vyjści na vulicu», — raspaviadaje ŭžo były hałoŭny metrolah BiełOMA Siarhiej Chrypovič.
Zvolnieny metrolah adpracavaŭ na zavodzie 36 hadoŭ
Na nastupny dzień hieneralny dyrektar sabraŭ načalnikaŭ strukturnych padraździaleńniaŭ, pahavaryli davoli karektna, kaža Siarhiej Chrypovič. Jašče praź dzień źjaviŭsia zahad — vynieści ŭsim šarahovym pracaŭnikam zaŭvahi, a Chrypoviču jak kiraŭniku — vymovu.
A ŭ čaćvier, 29 kastryčnika, usim parušalnikam dyscypliny prapanavali zvolnicca pa zhodzie bakoŭ. U piatnicu zvolnili pieršuju hrupu — 7 čałaviek.
«Ja skazaŭ, što nie napišu zajavu pa ŭłasnym žadańni. Zavod Vaviłava — majo adzinaje miesca pracy, ja tut adpracavaŭ 36 hadoŭ. Raźmierkavali mianie siudy paśla technikumu, adsiul pajšoŭ u vojska, skončyŭ radyjotechničny instytut, prajšoŭ usie stadyi — ad ślesara, inžynera, načalnika adździeła da hałoŭnaha metrolaha», — kaža Siarhiej Chrypovič.
3 listapada Siarhieja Chrypoviča zvolnili pa artykule 42 punkcie 6 Pracoŭnaha kodeksu — «pa inicyjatyvie najmalnika»: za vymovu, da jakoj znajšli jašče adnu nibyta «niepahašanuju zaŭvahu».
4 listapada zvolnili jašče 7 čałaviek. Jašče adzin namieśnik načalnika adździeła admoviŭsia padpisać zajavu «pa zhodzie bakoŭ», jaho taksama zvolnili pa artykule.
Siarhiej Chrypovič maje namier padać zajavu ab niezakonnym zvalnieńni ŭ sud.
Načalnik adździeła kadraŭ: «Rašeńnie ab zvalnieńniach prymaŭ nia ja»
Namieśnik hieneralnaha dyrektara pa režymu, kadrach i idealahičnaj pracy Biełaruskaha optyka-mechaničnaha abjadnańnia Viačasłaŭ Kuźniacoŭ z 9 listapada ŭ adpačynku. U pryjomnaj hiendyrektara nakiravali da načalnika adździeła kadraŭ Jaŭhiena Ihnatčyka.
Spadar Ihnatčyk paćvierdziŭ, što za tydzień (u apošnija dni kastryčnika i pieršyja dni listapada) było zvolniena bolš za 15 čałaviek. U asnoŭnym — «pa zhodzie bakoŭ», a dva čałavieki — pa inicyjatyvie najmalnika za spahnańni.
«Što tyčycca Chrypoviča, jon byŭ zvolnieny pa 42-mu artykułu. Zrazumiejcie, rašeńnie prymaŭ nia ja. U adździeł kadraŭ pastupili dakumenty, nam daviałosia ich aformić. Zahad ab spahnańni byŭ padpisany hieneralnym dyrektaram Alaksandram Marozam i namieśnikam pa idealohii i kadram Viačasłavam Kuźniacovym. Ja viedaju, što ź imi razmaŭlała kiraŭnictva. Ale farmalna jany parušyli krychu pracoŭnaje zakanadaŭstva — 40 chvilin pracoŭnaha času zaniali svaim schodam», — tłumačyć načalnik adździeła kadraŭ Jaŭhien Ihnatčyk.
