Rasijskaja śpiecsłužba vykarystoŭvaje biełarusaŭ u jakaści pravadyroŭ dla pierapraŭki svaich ahientaŭ va Ukrainu. Takija vysnovy naprošvajucca paśla čytańnia pastanovy Vińnickaha haradskoha suda ab vyzvaleńni ad kryminalnaj adkaznaści hramadzianina Rasii, u dačynieńni da jakoha była zaviedziena kryminalnaja sprava pa artykułach «padrychtoŭka da ździajśnieńnia złačynstva» i «špijanaž», paviedamlajuć Mocnyja naviny.
Ranicaj 16 žniŭnia z boku miažy ź Biełaruśsiu ŭ punkt propusku Vystupovičy pryjšoŭ mužčyna, jaki pakazaŭ ukrainskim pamiežnikam pašpart hramadzianina Rasii i źviarnuŭsia z zajavaj ab pradastaŭleńni jamu palityčnaha prytułku.
Sa słoŭ rasijanina, na radzimie jon pad psichałahičnym i fizičnym ciskam vymušany byŭ supracoŭničać z FSB. Nibyta na praciahu 2013—2015 hadoŭ jon pracavaŭ na FSB.
U lutym 2015 hoda mužčyna pierajechaŭ u Sankt-Pieciarburh, dzie ŭładkavaŭsia na pracu ŭ arhanizacyju, jakaja zajmałasia ramontam na terytoryi abaronnaha zavoda. Tam jon padtrymlivaŭ suviaź i vykonvaŭ zadańni inšaha kuratara FSB. A potym jamu heta ŭsio, jak havorycca, nadakučyła, i jon vyrašyŭ spynić supracoŭnictva sa śpiecsłužbaj. Zrabić heta možna było tolki adnym sposabam, ale, akramia Ukrainy, biehčy nie było kudy.
7 vieraśnia ahient Paŭnočny sam pryjšoŭ va USB Vińnickaj vobłaści ź piśmovaj zajavaj, što ŭsio, pra što jon raniej raspavioŭ, było raspracavanaj jaho kurataram lehiendaj, a nasamreč jon atrymaŭ zadańnie atrymać va Ukrainie status biežanca i zaniacca špijonskaj dziejnaściu.
Ahienta Paŭnočnaha pa chadajnictvie prakuratury sud vyzvaliŭ ad kryminalnaj adkaznaści. Ciapier, miarkujučy pa ŭsim, eks-špijon čakaje atrymańnia statusu biežanca.
Jak paviedamiŭ ahient Paŭnočny, padrychtoŭka da jaho zasyłańnia va Ukrainu pačałasia ŭ śniežni 2019 hoda, kali ad svajho kuratara ŭ Sankt-Pieciarburhu jon atrymaŭ zadańnie źjeździć u Mazyr i paznajomicca ź miascovym žycharom, jaki tajemnymi ściežkami zabiaśpiečvaje nielehalny pierachod miažy.
6 žniŭnia ahient atrymaŭ ad svajho kuratara 2 tysiačy dalaraŭ, a 9 žniŭnia adpraviŭsia ŭ šlach pa zahadzia ahavoranym maršrucie: Sankt-Pieciarburh — Kinhisiep — Hdoŭ — Pskoŭ — Siebiež — Aśvieja — Połack — Minsk — Mazyr. U Mazyry jon sustreŭsia z pravadnikom, jaki dapamoh jamu pierasiekčy biełaruska-ŭkrainskuju miažu. Pa słovach ahienta, išli jany ŭzdoŭž naftapravoda «Družba», stroha prytrymlivajučysia instrukcyi jaho kuratara ŭ FSB.
Siońnia pastanova suda ŭstupiła ŭ zakonnuju siłu.