Uładzimir Astapienka ŭviečary 27 kastryčnika nakiravaŭ list u Administracyju prezidenta, a taksama Ministerstva zamiežnych spraŭ. Pasoł Biełarusi ŭ Arhiencinie prosić vyzvalić jaho ad zajmanaj pasady.
Spadar Astapienka nie moža bolš vykonvać svaje paŭnamoctvy praz tyja padziei, što adbyvajucca ŭ krainie ad žniŭnia.
Uładzimir Astapienka (źleva) u MZS Pieru. Fota z sajta pasolstva.
«Prašu vyzvalić mianie ad pasady nadzvyčajnaha i paŭnamocnaha pasła Respubliki Biełaruś u Arhiencinskaj Respublicy (pa sumiaščalnictvu ŭ Parahvai, Pieru, Uschodniaj Respublicy Uruhvaj i Čyli) na padstavie artykuła 41 Pracoŭnaha kodeksa Respubliki Biełaruś u suviazi z parušeńniami najmalnikam zakanadaŭstva, jakoje pieraškadžaje vykanańniu majoj pracy pa pracoŭnym dahavory», — piša Astapienka.
Paśla hetaha jon pieraličvaje nastupnyja punkty:
«1. Šmatlikija parušeńni asnoŭnych pravoŭ i svabod hramadzian Biełarusi, zamacavanych u Kanstytucyi krainy i jaje mižnarodna-pravavych abaviazacielstvach;
2. vidavočnyja i hrubyja falsifikacyi vynikaŭ prezidenckich vybaraŭ 9 žniŭnia 2020 hoda,
što źjaviłasia pryčynaj ich niepryznańnia 27 dziaržavami-členami ES, Vialikabrytanijaj, ZŠA, Kanadaj, Ukrainaj i inšymi krainami;
3. nieapraŭdana žorstkaja reakcyja orhanaŭ unutranych spraŭ (užyvańnie praźmiernaj siły i śpiecyjalnych srodkaŭ) u adkaz na zakonnyja akcyi mirnaha pratestu;
4. niepravamiernaje zaciahvańnie pryniaćcia rašeńniaŭ ab zaviadzieńni kryminalnych spraŭ pa faktach zabojstvaŭ, katavańniaŭ, seksualnaha hvałtu, masavych źbivańniaŭ, advolnych zatrymańniaŭ, iłžyvych śviedčańniaŭ z boku pravaachoŭnych orhanaŭ;
5. nievykanańnie patrabavańniaŭ nacyjanalnaha zakanadaŭstva i mižnarodna-pravavych zvyčajaŭ, jakija praduhledžvajuć nieabchodnaść zabieśpiačeńnia maksimalnaj publičnaści pry arhanizacyi cyrymonii prezidenckaj inaŭhuracyi», — adznačaje Astapienka.
Jon ličyć, što ŭsie hetyja punkty stvarajuć «abjektyŭnyja ŭmovy dla niepryznańnia lehitymnaści kiraŭnika dziaržavy i mižnarodnaj izalacyi Biełarusi».
«U svaju čarhu adsutnaść mižnarodnaj lehitymnaści kiraŭnika dziaržavy nie dazvalaje mnie i jak dypłamatu, i jak patryjotu svajoj krainy praciahvać dobrasumlennaje vykanańnie słužbovych abaviazkaŭ pasła, znachodziačysia ŭ padnačaleńni ŭ asoby, jakaja nie maje prava vyražać volu biełaruskaha naroda», — zakančvaje svoj zvarot spadar pasoł.
Uładzimiru Astapienku 58 hadoŭ, jon adzin z najbolš daśviedčanych dypłamataŭ Biełarusi. Jon skončyŭ maskoŭski MDIMA (MHIMO) jašče ŭ 1985 hodzie, paśla čaho pačaŭ pracu ŭ MZS BSSR.
U pieršyja hady niezaležnaści Astapienka byŭ namieśnikam ministra zamiežnych spraŭ Biełarusi. Papracavaŭ u pasolstvach Biełarusi ŭ Niderłandach i Bielhii. Potym doŭhi čas pry Alaksandru Kazulinu byŭ prarektaram BDU pa mižnarodnaj dziejnaści.
Z 2008 pa 2015 byŭ pasłom Biełarusi na Kubie. U 2017 pryznačany pradstaŭnikom našaj krainy ŭ Arhiencinie. Vałodaje anhlijskaj, ispanskaj i polskaj movami.
Raniej pasady pasłoŭ Biełarusi pa palityčnych pierakanańniach pakinuli Ihar Laščenia (Słavakija), Pavieł Pustavy (Ispanija). Taksama byŭ zvolnieny pasoł Biełarusi ŭ Łatvii Vasil Markovič. Taksama dypłamatyčnaha ranhu byŭ pazbaŭleny Pavieł Łatuška.