U Jeŭraparłamiencie abmierkavali dakład ab adnosinach ź Biełaruśsiu, piša DW.
Z punktu hledžańnia Jeŭrasajuza, ułady Biełarusi ŭsio bolš upadajuć u adčaj. Pra heta zajaviŭ viarchoŭny pradstaŭnik ES pa zamiežnaj palitycy Žazep Barel, spasłaŭšysia na pahrozu biełaruskich siłavikoŭ pačać prymianiać bajavuju zbroju dla padaŭleńnia pratestaŭ. «Heta sihnały, jakija vyklikajuć vialikuju zaniepakojenaść, ale heta taksama i prykmiety adčaju ŭładaŭ», — adznačyŭ Barel. Pry hetym jon ličyć, što ciarpieńnie ludziej u Biełarusi zakančvajecca. Prykmietaj hetaha, pa jaho słovach, staŭ «narodny ultymatum», vyłučany lidaram biełaruskaj apazicyi Śviatłanaj Cichanoŭskaj.
Barel vystupaŭ u aŭtorak, 20 kastryčnika, na abmierkavańni dakładu ŭ Jeŭraparłamiencie ab adnosinach ź Biełaruśsiu. Aŭtar dakładu — litoŭski deputat z frakcyi «Abnavić Jeŭropu» Piatras Aŭštravičus — nahadaŭ, što pratesty ŭ Biełarusi nie spyniajucca ŭžo bolš za 70 dzion.
«Biełarusy padviarhajucca niezakonnym aryštam, źniavaham, napadam, im nanosiać traŭmy. Heta robiać pravaachoŭnyja orhany, jakija pavinny byli b ich abaraniać… Usia hetaja žorstkaść ździajśniajecca z-za adnaho čałavieka — Alaksandra Łukašenki, jaki stavić svaje intaresy vyšej za budučyniu biełaruskaha naroda i niezaležnaść Biełarusi», — zajaviŭ Aŭštravičus. Pa jaho słovach, recept, da jakoha pavinien źviarnucca ES, zvodzicca da troch prostych rečaŭ: salidarnaść, padtrymka i sankcyi.
Taki padychod ličyć pravilnym pradstaŭnik frakcyi «jeŭrapiejskich kansiervataraŭ i refarmistaŭ» Hanna Fatyha. «Užo bolš za 70 dzion iduć rašučyja pratesty biełarusaŭ suprać prezidenta-uzurpatara, jaki vykarystoŭvaje ŭsiu siłu dziaržavy suprać mirnaha nasielnictva», - adznačyła jana i zaklikała pašyryć sankcyi, a taksama ŭzmacnić padtrymku ludziej u Biełarusi.
Padtrymaŭ ideju ŭnieści novyja proźviščy ŭ sankcyjny śpis i charvacki sacyjał-demakrat Tanina Picuła, choć u inšych vypadkach jaho frakcyja zajmaje, chutčej, strymanuju pazicyju pa pytańni ab sankcyjach. Jon taksama padkreśliŭ, što ES pavinien pradastavić dapamohu achviaram represij u Biełarusi.
Što Jeŭraparłamient moža zrabić na praktycy dla Biełarusi?
«My ŭžo ŭ čaćviorty raz pravodzim debaty (ab Biełarusi. - Red.). Pakul my viadziom debaty, tych, chto maje śmiełaść vystupać suprać niespraviadlivaści i hvałtu, vykradajuć, zatrymlivajuć, kidajuć u turmu, bjuć, padviarhajuć katavańniam i hvałciać… Dastatkova debataŭ, davajcie piarojdziem da spraŭ», — zaklikała jeŭradeputat z Hiermanii Vijoła fon Kramon z frakcyi «zialonych». Jana, u pryvatnaści, prapanavała ŭnieści ŭ sankcyjny śpis usich, chto vykonvaje niezakonnyja zahady Łukašenki, a taksama dać šenhienskija vizy i mahčymaść pracy ŭ ES tym, chto padviarhajecca pieraśledu ŭ Biełarusi.
«Usim žorstkim režymam kali-niebudź prychodzić kaniec. Dyktatura Łukašenki — nie vyklučeńnie. My pavinny padrychtavacca da mirnaj pieradačy ŭłady i ŭžo ciapier paabiacać finansavuju dapamohu demakratyčnamu ŭradu paśla sychodu Łukašenki», — adznačyła fon Kramon.
Jeŭraparłamient nie maje pramoha ŭpłyvu na vypracoŭku zamiežnapalityčnaha kursu Jeŭrasajuza. Ale Andrus Kubilus, litoŭski jeŭradeputat ad najbujniejšaj frakcyi — Jeŭrapiejskaj narodnaj partyi, — viedaje, što moža zrabić sam parłamient: stvaryć misiju z byłych prezidentaŭ i premjeraŭ — pa prykładzie misii eks-prezidenta Polščy Alaksandra Kvaśnieŭskaha i byłoha śpikiera Jeŭraparłamienta Peta Koksa. Takuju misiju Jeŭraparłamient sfarmavaŭ u 2012 hodzie dla manitorynhu palityčna matyvavanych kryminalnych spraŭ va Ukrainie, u pryvatnaści, suprać eks-premjera Julii Cimašenka.
Jašče adna prapanova Kubilusa — stvaryć śpiecyjalny centr dla «mižnarodnaha rasśledavańnia złačynstvaŭ AMAPa». Jaho zadańniem stała b rehistracyja parušeńniaŭ i pradastaŭleńnie pravavoj dapamohi paciarpiełym padčas pratestaŭ.
Barel: Abanient u Minsku niedastupny
Praktyčna ŭsie jeŭradeputaty vykazalisia ŭ padtrymku dakładu. Krytyčna adazvaŭsia pra jaho tolki pradstaŭnik pravapapulisckaj frakcyi «Identyčnaść i demakratyja» Ćjery Maryjani. Jaho, zrešty, nie zadavalniaje tolki punkt dakładu, jaki zaklikaje pryznać vynik prezidenckich vybaraŭ u Biełarusi na padstavie sacyjałahičnaha apytańnia ŭ internecie.
Barel, u svaju čarhu, u druhim vystupie ŭ kancy debataŭ padkreśliŭ, što adzinaje vyjście ź situacyi — praviadzieńnie novych, sumlennych i spraviadlivych vybaraŭ. U hetym zaklučajecca aficyjnaja pazicyja Jeŭrasajuza, uzhodnienaja ministrami zamiežnych spraŭ tydniem raniej.
Barel nahadaŭ, što ES nie pryznaŭ vybaraŭ 9 žniŭnia, pa vynikach jakich Alaksandr Łukašenka abviaściŭ siabie prezidentam Biełarusi.
Kiraŭnik dypłamatyi Jeŭrasajuza dadaŭ, što padtrymlivaje prapanovu ABSE vystupić pasiarednikam pamiž Łukašenkam i apazicyjaj. Ale šancy, što ŭłady Biełarusi pojduć na taki dyjałoh, jon ličyć nievysokimi.
9 kastryčnika Barel havaryŭ pa telefonie z kiraŭnikom MZS Biełarusi Uładzimiram Makiejem, ale na dalejšyja kantakty z Brusielem Minsk nie idzie. «Ja pavinien skazać, što, da majho žalu, biełaruskija ŭłady zusim nie adkazvajuć. Jak havorycca, abanient niedastupny», — panarakaŭ Barel.
