Fota: Kaciaryna Hardziejeva, Tut.by
Nievialikaja hrodzienskaja kaviarnia-kandytarskaja «Luboŭ Tartova», jakaja znachodzicca ŭ dvarach staroha centra i pra jakuju mnohija tutejšyja raniej navat i nie čuli, niečakana stała znakamitaj. Na minułym tydni tut admovilisia zrabić tort, jaki chacieli zamović prychilniki dziejnaj ułady ŭ padtrymku miascovaha AMAPa.
Infarmacyja pra situacyju spačatku źjaviłasia ŭ adnym z praŭładnych čataŭ: karystalnik napisaŭ, što ŭstanovu treba «abychodzić bokam». A ŭ inšych haradskich i dvarovych čatach haradziency ź inšymi pohladami, naadvarot, vyrašyli padtrymać kaviarniu — i za piatnicu tam skupili ŭsie torty i pirožnyja, piša Tut.by.
Usiu piatnicu ŭ kaviarniu išli ludzi. U vyniku ŭžo paśla abiedu na pryłaŭkach nie zastałosia ni tartoŭ, ni pirožnych, a haradziency ŭsie išli i išli.
Pradaviec kandytarskaj — heta mienavita jana napiaredadni admoviłasia prymać zamovu na tort u padtrymku AMAPa z adpaviednymi nadpisami — kaža, što takaja papularnaść dla ŭstanovy stała niečakanaściu i dla jaje, i dla ŭłaśnikaŭ ustanovy. Z adnaho boku, kaža žančyna, prymajučy takoje rašeńnie, jana prosta chacieła być «pa-za palitykaj», z druhoha — ciapier u kaviarni aścierahajucca, što siudy mohuć začaścić pravierki, z treciaj ža — viadoma, vielmi pryjemnaja takaja padtrymka hrodziencaŭ.
— U zvyčajnyja dni ŭ nas prodažy siarednija, možna skazać. U Dzień maci było krychu lepš, a ciapier skupili praktyčna ŭsie torty, — kaža pradaviec.
Za paŭdnia jana pradała bolš 30 tortaŭ — dla maleńkaj kandytarskaj heta vielmi šmat.
Torty, jakija «vydaje» kandytarski cech, adrazu ž raskuplajuć. U kaviarni pačali prymać zamovy ŭžo na niadzielu.
Pra situacyju z «tortam u padtrymku AMAPa» pradaviec kaža nieachvotna.
— Patelefanavali zamović, skazali dla čaho, my admovili. Voś tak usio i vyjšła. Vy prabačcie, ja zaraz vielmi zaniataja: hladzicie, kolki pakupnikoŭ, — kaža pradaviec.
Ułaśniki kandytarskaj za rašeńnie admović jaje «nie łajali i zrazumieli», a ŭ kaviarniu ciapier telefanuje šmat ludziej: adny kažuć słovy padtrymki, druhija — paprakajuć.
A što ž tort dla AMAPa? Jaho ŭsio ž śpiakli niejkija inšyja ludzi, i hrupa haradziencaŭ 14 kastryčnika pajšła va UUS, kab padziakavać supracoŭnikam za słužbu. U svaju čarhu, milicyjanty zapeŭnili, što «buduć dalej zabiaśpiečvać spakojnaje žyćcio i hramadski paradak na haradzienskaj ziamli», paviedamlaje UUS.
