Fota Nadziei Bužan.
«Raša tudej» vydała materyjał-«analiz» niadzielnych pratestaŭ u Minsku. Śpikieram staŭ viadomy vajenny ekśpiert ź Minska Alaksandr Alesin.
«Alesin śćviardžaje, što ŭ niadzielu apazicyjaniery rychtavalisia zachapić rezidencyju prezidenta, ale praz adklučany internet nie atrymali z Polščy sihnału ab pačatku šturmu i vymušany byli razyścisia. Za śpinami mirnych pratestoŭcaŭ znachodzilisia bajeviki, hatovyja ŭžyć siłu suprać AMAPa i palicyi. Jany źbiralisia pa ŭzory ŭkrainskich kaleh uzbroicca łamami, kapačami i vykarystoŭvać ich u vuličnych bajach», — «cytuje» prapahanda Alesina.
Akazvajecca, Alesin navat nie ŭ kursie taho, što havaryŭ z «Raša tudej», bolš za toje, hetamu vydańniu jon nie hatovy ŭ pryncypie davać choć jakoje intervju z maralna-etyčnych pryčyn. Pra heta jon skazaŭ «Našaj Nivie».
«Heta nie maje słovy! Ja hetaha nie kazaŭ! I ŭvohule ja z «Raša tudej» nie havaryŭ i havaryć nie budu. Mnie pa telefonie zvaniła zusim inšaje vydańnie, kazaŭ ja inšaje:
šturmu nijakaha i nie płanavałasia, pratest nie maje pravadyroŭ, jakija b mahli zaklikać da takoha i pavieści za saboj, šturmu nie mahło być.
Ale Boh im sudździa. Ja rasceńvaju heta jak prajavu infarmacyjnaj vajny: pazvoniać, a potym śviadoma skažajuć infarmacyju», — skazaŭ Alesin.
