U Minsku i inšych haradach Biełarusi 25 žniŭnia praciahnulisia zatrymańni ŭdzielnikaŭ mirnych masavych akcyj, a taksama ludziej ź bieł-čyrvona-biełymi ściahami, paviedamlajuć pravaabaroncy.
Stała viadoma pra zatrymańnie ŭ Minsku kala budynku Ministerstva adukacyi Maksima Šulskaha. U hety dzień tam prachodziła akcyja nastaŭnikaŭ. Maksima pavieźli ŭ RUUS Maskoŭskaha rajona.
Taksama paviedamlajecca, što ź viečara 24 žniŭnia pierastaŭ vychodzić na suviaź rabotnik MTZ Maksim Mitunievič. Viadoma, što jon udzielničaŭ u zabastoŭcy i mitynhach.
Uviečary na płoščy Niezaležnaści prachodziła akcyja «Śviata niezaležnaści». Paśla 9 viečara ŭ rajonie płoščy zatrymali niekalki čałaviek, paviedamlaje TUT.BY. Niedaloka ad prypynku schapili čałavieka i zakinuli ŭ mikraaŭtobus. «Zatrymali čałavieka sa ściaham niedaloka ad kaścioła. Chłopiec prosta išoŭ ź dziaŭčynaj, jaje adpuścili».
Čytačy «Našaj Nivy» paviedamili pra zatrymańnie mužčyny pa imieni Arciom Isačenka, jaki pryvioz na płošču kałonki dla hukaŭzmacnieńnia. Jaho, pa słovach čytačoŭ, vyciahnuli z taksi, kali jon adjazdžaŭ.
U «Viasnu» paviedamili pra zatrymańnie kala HC «Stalica» Daniiła Šafrana. U jaho był bieł-čyrvona-bieły ściah, kala 6 viečara jon patelefanavaŭ blizkim i paviedamiŭ, što znachodzicca ŭ RUUS Maskoŭskaha rajona, adnak svajakam tam nie paćviardžajuć hetaj infarmacyi.
U Hrodnie byli zatrymanyja kala 28 supracoŭnikaŭ «Hrodna Azot», ich advieźli ŭ RAUS. Kab ich padtrymać, kala RAUS sabrałasia šmat ludziej. U chutkim časie supracoŭnikaŭ adpuścili, ale AMAP pačaŭ zatrymlivać tych, chto pryjšoŭ padtrymać ich. Vidavočcy kažuć pra źbitaha chłopca, jakoha hruzili ŭ aŭtazak. Padrabiaznaści vyśviatlajucca.
Taksama ŭ Hrodnie ŭ tralejbusie zatrymali aktyvista Jaŭhiena Dudkina. Jon byŭ kala RAUS sa ściaham.
Jość videa, jak žančyny kala adnaho z damoŭ u Hrodnie sprabujuć adbić u milicyi zatrymanaha, ale biespaśpiachova.
U Homieli padčas viečarovaha šeścia zatrymali aktyvista Uładzimira Niapomniaščych.
U Babrujsku zatrymali muža babrujskaj žurnalistki «Viačerniaha Babrujska» Iryny Chamrenka-Ušakovaj Ivana Chamrenku. Jany byli na łancuhu salidarnaści kala HC «Karusiel». Zaraz jon znachodzicca ŭ budynku UUS Babrujskaha harvykankama.
U Mahilovie dniom byŭ zatrymany Valeryj Viarbicki. Jon razam z žonkaj i maleńkim synam išoŭ pa Pieršamajskaj vulicy, na plačach u jaho byŭ bieł-čyrvona-bieły ściah. Raptam kala ich spyniłasia aŭto, ź jaho vyskačyli dvoje supracoŭnikaŭ u cyvilnym, nie pradstaŭlajučysia i biez tłumačeńniaŭ, hruba adšturchnuli žančynu i dzicia, mocna napałochaŭšy ich, skrucili Valeryja i zapichali ŭ mašynu. Pa stanie na 10 viečara z RAUS jaho tak i nie adpuścili.
