U reanimacyi 3-dziciačaj balnicy Minska ciapier lažyć 16-hadovy Cimur M. Tudy jaho dastavili z Partyzanskaha RUUS 13 žniŭnia, a 12 žniŭnia zatrymali ŭ rajonie Kamiennaj horki. Chłopiec byŭ u miedykamientoznaj komie, jon vielmi mocna źbity, u jaho čerapna-mazhavaja traŭma, strasieńnie hałaŭnoha mozhu, adkryty pierałom skuły — arbitalnaha kompleksu, sutarhavy sindrom, paraarbitalnaja hiematoma sprava, množnyja ŭdary miakkich tkanin i kaniečnaściaŭ, traŭmatyčnyja erozii rahavicy abodvuch vačej. Siamja płanuje źviartacca ŭ prakuraturu i Cledčy kamitet, kab praviali rasśledavańnie i pryciahnuli vinavatych da kryminalnaj adkaznaści, piša Tut.by.
— Ź Cimuram my ŭčora paśpieli pahavaryć, pry słovie «milicyja» ŭ jaho pačynajecca paničnaja ataka, jamu pałkaj vykołvali vočy, - raspaviadaje mama padletka Taćciana Mikałajeŭna.
12 žniŭnia Cimur ź siabram pavinny byli jechać na daču na rybałku i chłopiec pajšoŭ da jaho. Ale Cimur prapaŭ: da adnaho jon nie pryjechaŭ, siamja šukała syna. 13 žniŭnia mamie patelefanavali sa škoły i skazali, što Cimur u balnicy. U 3-ju haradskuju dziciačuju balnicu jaho dastavili na chutkaj z Partyzanskaha RUUS. Zaraz chłopiec u reanimacyi, byŭ u miedykamientoznaj komie.
Taćciana Mikałajeŭna dasyłaje daviedku syna z balnicy, dyjahnaz zajmaje šeść radkoŭ. U Cimura čerapna-mazhavaja traŭma lohkaj stupieni, strasieńnie hałaŭnoha mozhu, adkryty pierałom skuły —arbitalnaha kompleksu biez zrušeńnia sprava (pierałom vierchniaskivicavaj azuchi biez zrušeńnia adłomkaŭ, liniejny pierałom dna arbity biez zrušeńnia atłomkaŭ), hiemasinusit pravaj vierchniaśvivicavaj pazuchi, sutarhavy sindrom, paraarbitalnaja hiematoma sprava, množnyja ŭdary miakkich tkanin i kaniečnaściaŭ, traŭmatyčnyja erozii rahavicy abodvuch vačej.
- Jaho zatrymali na dyśpietčarskaj stancyi Zachad-3, heta kala stancyi mietro «Kamiennaja horka», — raspaviadaje Arciom, brat Cimura. — Jaho źbili padčas zatrymańnia, potym u aŭtazaku, paśla hetaha niekalki prypynkaŭ rabili i taksama bili. U balnicu jon trapiŭ 13 žniŭnia. Jon raspaviadaje, što jaho bili elektrašokieram pa piatkach, kazali, ty ciapier budzieš śpiavać himn AMAPa, jon admaŭlaŭsia, paśla hetaha jaho hałavu pierakulili, jaho trymali, u rot zasunuli pałku i zabivali jaje. Cimur kaža, što jamu jašče pašancavała —mužyku, jaki byŭ pobač, pałku ŭ pramuju kišku zasunuli, a 14-hadovaha chłopca bili pa hienitalijach.
Pa słovach Arcioma, Cimur užo ŭ śviadomaści, i jon raskazaŭ, što paśla katavańniaŭ jaho chacieli kinuć u padvał, ale pryjšoŭ niejki mužčyna i skazaŭ, što heta budzie na ich sumleńni, pačaŭ jaho adkačvać, vyklikali chutkuju.
- Daktary kažuć, što jaho stan palapšajecca, jaho vyvieli z komy, učora jon sa mnoj razmaŭlaŭ chvilin 30, žartavaŭ i śmiajaŭsia. I ŭčora ŭviečary da jaho milicyja sprabavała patrapić, nam taksama telefanavali dadomu, kazali, što buduć razhladać situacyju Cimura dla raspačynańnia kryminalnaj spravy, ja tak razumieju na AMAPaŭcaŭ, - kaža Arciom.
Cimur dahetul u reanimacyi, jon sa šmatdzietnaj siamji, dzie dzieviać dziaciej. Jon vučycca ŭ škole, zachaplajecca rybałkaj.
Rodnyja Cimura buduć źviartacca ŭ prakuraturu i Śledčy kamitet, kab praviali rasśledavańnie i pryciahnuli vinavatych da kryminalnaj adkaznaści.
