Siońnia kiraŭnik dziaržavy vykazaŭsia, što nie ličyć Śviatłanu Cichanoŭskuju svaim hałoŭnym praciŭnikam na vybarach. A taksama prakamientavaŭ, što ŭpieršyniu čuje ab zatrymańni 8 supracoŭnikaŭ jaje štaba, piša Tut.by
Paśla hałasavańnia Alaksandr Łukašenka tradycyjna adkazvaje na pytańni žurnalistaŭ. Adzin ź ich byŭ ab tym, što za apošnija sutki aryštavanyja 8 čałaviek z štaba kandydata Śviatłany Cichanoŭskaj.
— Siarod ich kiraŭnik štaba Maryja Maroz i jaje davieranyja asoby. I ŭ cełym usia kamanda Cichanoŭskaj…
Žurnalist Deutsche Welle jašče nie paśpieŭ da kanca zadać pytańnie, jak Łukašenka ŭziaŭ słova:
— Chvilinačku! Dzie Maroz ciapier? — źviartajecca jon da kaho-niebudź z svajoj kamandy i daje daručeńnie. — Kali łaska, raźbiaryciesia, dzie Maroz ciapier. Treba pradmietna razmaŭlać. Ja pieršy raz čuju ab tym, što aryštavanyja 8 čałaviek. Nikoli nie kidajciesia słovami, kali nie razumiejecie, ab čym idzie havorka. U nas aryštoŭvać ludziej niama sensu, jak i ŭ luboj inšaj krainie. Ich spačatku zatrymlivajuć, navat kali jany vinavatyja. I praz, napeŭna, 8-10 dzion im pradjaŭlajuć pretenzii, pradjaŭlajuć abvinavačvańnie i aryštoŭvajuć. Tamu nie kidajciesia słovami
Łukašenka abiacaje, što jamu ciapier «dałožać, dzie znachodzicca hetaja vaša Maroz».
— U lubym vypadku 8 čałaviek byli zatrymanyja, i ŭ cełym usia jaje kampanija supravadžałasia represijami na adras jaje prychilnikaŭ. Čamu vy jak dziejny kiraŭnik dziaržavy dazvalajecie taki biesprecedentny cisk na svajho hałoŭnaha praciŭnika Śviatłanu Cichanoŭskuju? — spytaŭ žurnalist.
— U mianie čatyry hałoŭnyja supierniki. Ja nie liču hetaha čałavieka hałoŭnym kankurentam, heta vy jaje, niebaraku, zrabili hałoŭnym kankurentam i jana ščyra pryznajecca ŭ tym, što naohuł nie razumieje, kudy jana trapiła, navošta jana trapiła i naohuł, što rabić.
Tamu nie treba tut nahniatać abstanoŭku, i vam taksama ŭ Deutsche Welle. Nichto, nijakich represij u parušeńni zakona nie rabiŭ i pradprymać nie budzie. Vykonvajcie zakon, vykonvajcie zakon — i źniknuć usialakija razmovy pra represii ci jašče pra niešta. Zakon i tolki zakon. Budziecie parušać — budziem adkazvać. I toje, my jašče miakka adkazvajem, miakka. I ščyra vam skažu, što zaŭsiody strymlivaŭ pravaachoŭnikaŭ: «nie treba!». Paŭtaryć, što ja im skazaŭ?
«Jany ničoha nie vartyja, kab suprać ich rabić niejkija represii». Vybačajcie, što ja vam adkryŭ hety sakret. Ničoha nie vartyja z punktu hledžańnia palityki — - kaža Łukašenka. - Kali vy zachoplenyja svaim kandydatam, pra jaki tolki što skazali, adkažycie mnie na pytańnie: što heta za prahrama? Praviadziom vybary niačesnyja, pieramožam u niačesnych vybarach, potym vypuścim palityčnych, ekanamičnych, narkamanaŭ, kryminalnikaŭ. Cytata: «Vypuścim i praviadziem česnyja vybary!» Rastłumačcie, što heta takoje! Vy choć čytali Kanstytucyju? Ja ŭžo ŭ Pasłańni hetaje pytańnie zakranuŭ: ni ja i ni kandydat, jaki pieramoža, kali nie ja, nie pryznačaje ŭ Biełarusi prezidenckija vybary. Parłamient vam nie daść mahčymaści ŭvieści krainu ŭ piermanientnyja vybary. Vy razumiejecie, što vy prapanujecie narodu? Vy navat nie padumali. I vy z prystojnaha ŚMI pačynajecie kryčać pra represii, jašče pra niešta. Vy spačatku padumajcie, što vy prapanujecie. I vy ličycie, što heta asnoŭny moj praciŭnik i pretendent na hetu pasadu… Haspodź z vami! Daj boh, kab u mianie zaŭsiody byli takija praciŭniki. Ja ž viedaju, chto tam što tvoryć, chto za joj staić. I vy viedajecie dobra.
Nie atrymajecca! Tak i pieradajcie Deutsche Welle i ŭsioj Hiermanii.
