19 lipienia Uładzisłaŭ Rymašeŭski padaryŭ kandydatu ŭ prezidenty Śviatłanie Cichanoŭskaj 51 ružu. Stolki dzion jaje muž, błohier Siarhiej Cichanoŭski, znachodzicca ŭ SIZA ŭ Minsku, piša Hrodna.life.
Uładzisłaŭ, jaki prasłaviŭsia 10 červienia na ŭsiu krainu, vyrašyŭ nie pastupać u hetym hodzie va ŭniviersitet. Kaža, što choča dačakacca pieramien i tady vučycca.
— U mianie ŭsio dobra, nijakaha cisku. Zaraz ja adpačyvaju i vyrašyŭ, što nie budu pastupać u hetym hodzie, choć i zdaŭ centralizavanaje testavańnie. Liču, što pry hetaj uładzie niama sensu vučycca, a potym pracavać za nizkuju zarpłatu. Što tyčycca siabroŭ i adnakłaśnikaŭ, to chtości adviarnuŭsia — vystupiŭ u padtrymku nastaŭnicy, a chtości naadvarot źjaviŭsia. Ad svaich słoŭ na liniejcy ja nie admaŭlajusia. Liču, što ja zrabiŭ pravilna.
Čamu ty vyrašyŭ padaryć kvietki Śviatłanie Cichanoŭskaj?
— Kab choć niejak jaje padtrymać. Jaje muž zmahaŭsia za nas, a ciapier jon niezakonna ŭtrymlivajecca ŭładaj, jakaja nie choča zrazumieć, što biełarusy — heta nie tolki pracavitaja i pamiarkoŭnaja nacyja, ale i razumnaja, mocnaja i hatovaja na mocnyja ŭčynki. Hetym razam my jamu [Alaksandru Łukašenku — red.] krainu nie addamo. Padaryŭ Śviatłanie 51 adnu ružu — stolki dzion Siarhiej Cichanoŭski ŭžo ŭ źniavoleńni. Heta ružy nie tolki ad mianie, ale i ad bolšaści biełarusaŭ.
Chto taki Uładzisłaŭ Rymašeŭski?
Uładzisłavu 17 hadoŭ. Jon sa zvyčajnaj biełaruskaj siamji. Mama zajmajecca manikiuram, tata handluje aŭtazapčastkami. 10 červienia ŭ minskaj himnazii № 192 byŭ vypuskny, pra jaki ciapier viedaje ŭsia kraina.
Na nastupny dzień paśla śviata Uładzisłaŭ zahruziŭ u internet videa sa svajoj pramovaj na vypusknym. Rolik za ličanyja chviliny razyšoŭsia pa sacyjalnych sietkach. Na vypusknym himnazist zakranuŭ temu majučych adbycca vybaraŭ i vykazaŭsia pra byłoha zavuča — nastaŭnicu biełaruskaj movy.
