Fota Nadziei Bužan
Pieršy kiraŭnik niezaležnaj Biełarusi Stanisłaŭ Šuškievič u 2018 hodzie pieradaŭ liderstva ŭ Biełaruskaj sacyjał-demakratyčnaj hramadzie Siarhieju Čeračniu. 35-hadovy Čeračań ciapier udzielničaje ŭ prezydenckaj honcy. Žurnalisty spytali ŭ Šuškieviča, jak jon aceńvaje ciapierašniuju kampaniju i pavodziny maładoha lidera BSDH, piša «Radyjo Svaboda».
«U nas podpisaŭ falšyvych być nia moža»
«U mianie daŭniaje ŭražańnie, što heta prystojny, hodny čałaviek. Na jaho stolki ciapier brudu stali vylivać, što ja jaho jašče bolš palubiŭ, — kaža Stanisłaŭ Šuškievič pra pretendenta na kandydactva ŭ prezydenty Siarhieja Čeračnia. — Dumaju, što pra kampaniju rana jašče kazać. Treba pačakać, što budzie z rehistracyjaj».
Stanisłaŭ Šuškievič kateharyčna admaŭlajecca kamentavać toje, što CVK naličyła Siarhieju Čeračniu i, mahčyma, inšym pretendentam bolš podpisaŭ u ich padtrymku, čym jany zdavali. Nazyvaje heta «pravakacyjaj» i śćviardžaje, što hetyja ličby pavinny być apublikavanyja ŭ aficyjnym dakumencie za podpisam staršyni CVK.
Pavodle śpisu, jaki raźmieščany na sajcie CVK, Čeračań zdaŭ 149 750 podpisaŭ, ź ich sapraŭdnymi pryznanyja 143 109. Tym časam pres-sakratar kamandy Čeračnia Aleh Čumakoŭ zajaŭlaŭ, što było zdadziena kala 106 tysiač podpisaŭ.
«My samaja daśviedčanaja kamanda pa zbory podpisaŭ, — kaža Stanisłaŭ Šuškievič pra kamandu Čeračnia. — U nas podpisaŭ falšyvych być nia moža. Moh być tolki pravakatar, jaki specyjalna ŭsunuŭsia i zrabiŭ niešta nia tak. A my sabrali nadziejnuju kolkaść podpisaŭ. Ja pra ličby havaryć nie chaču. Nijakich kamentaroŭ. My sabrali stolki, kab z ulikam mahčymych adbrakovak mieć sto tysiač podpisaŭ dla zaličeńnia Čeračnia kandydatam u prezydenty».
«Našaja ŭłada suprać našaj dziaržavy»
Stanisłaŭ Šuškievič pilna sočyć za vybarčaj kampanijaj i asudžaje aryšty jaje ŭdzielnikaŭ.
«Dla mianie poŭnaja niečakanaść toje, što adbyłosia ź viadomymi asobami, — kaža jon. — Nachabstva našaj ułady nie paraŭnalnaje ni z čym. Treba ŭsiaho bajacca, bo našaja ŭłada suprać našaj dziaržavy, suprać našaha narodu. A na čale — prezydent, jaki choča być pry ŭładzie. Roznyja versii, jakija vysoŭvajucca suprać kandydataŭ u kandydaty, — heta ŭsio tvorčaść chieŭry našaha prezydenta i tych, kamu jon dobra płacić za narodny košt, ź ludzkich padatkaŭ».
Jon kaža, što dobra viedaje ŭsich «hulcoŭ», aproč Viktara Babaryki.
«Ale ja pasłuchaŭ jaho, što jon kaža, i ščyra skažu, što jon mnie spadabaŭsia, — kaža Stanisłaŭ Šuškievič. — Vielmi spadabaŭsia. Capkału kamentavać nia budu, ja jaho vielmi daŭno viedaju. Heta vysokaadukavany čałaviek, ale hetuju adukavanaść možna pa-roznamu nakiravać. U paraŭnańni z Łukašenkam jon pa adukacyi hienij! Jon MDIMA skončyŭ na vydatna, heta nia vielmi prosta zrabić. Prystojnaja adukacyja palityčnych asob u dziaržavie mnie zaŭždy padabałasia».
Z sympatyjaj Šuškievič stavicca i da Siarhieja Cichanoŭskaha.
«Cichanoŭskuju ja nia viedaju, ale viedaju Cichanoŭskaha, — tłumačyć spadar Stanisłaŭ. — Jon mnie vielmi padabaŭsia. Braŭ u mianie interviju, była vialikaja razmova. Jon zrabiŭ dobraje ŭražańnie. Ja navat ździviŭsia, što ŭ Biełarusi jość takija daśviedčanyja i adčajnyja ludzi, jakija siabie nie škadujuć i zmahajucca za praŭdu».
Što da Hanny Kanapackaj, to dumka Stanisłava Šuškieviča pra jaje paśpieła pamianiacca.
«Kali druhi raz Hannu Kanapackuju nia vyłučyła AHP na parlamenckija vybary, ja navat joj paspačuvaŭ. Ale paśla, kali ja daviedaŭsia, što jana robić, paśla hetaha pseŭdazakonu, kab «zachavać Łukašenku na vieki viečnyja», to ŭ mianie niama prystojnaha słova, kab jaje acharaktaryzavać. Heta niekarektnyja pavodziny. Ja spačuvaŭ hetaj žančynie — pryjemnaja, pryhožaja, mierkavańni vykazvaje, ale tut inšaje», — kaža Šuškievič.
«U mianie jość svaje dumki, ale ja chaču pahladzieć, što ludzi pra ich dumajuć, — kaža Šuškievič pra inšych pretendentaŭ u kandydaty. — Ja siabra hrupy Čeračnia, ale ščyra skažu, što padpisvaŭsia nia tolki za jaho. Ale moj kandydat — Čeračań».
«Narmalnym čynam vybrać Łukašenku niemahčyma»
Stanisłaŭ Šuškievič kaža, što ciapier najpierš čakaje rehistracyi kandydataŭ.
«Ja čakaju, jak budzie siabie pavodzić ułada. Jana budzie vybirać taki srodak, kab Łukašenku abrać pieravažnaj bolšaściu, — tłumačyć palityk. — A vidavočna absalutna, što ani pra jakuju jahonuju bolšaść siońnia nielha havaryć. Kali za jaho podpisy źbirali, kala jahonaha stolika nivodnaha čałavieka nie było. Usio zaležyć ad taho, jakoje rašeńnie ciapier prymie tak zvanaja CVK, jaki čarhovy fars jana planuje. Bo narmalnym čynam vybrać Łukašenku niemahčyma. Jon nie nabiare 50% hałasoŭ ani ŭ jakim razie pry toj niepapularnaści, jakuju maje ŭ krainie».
Na pytańnie, kolki nabiare lider BSDH Siarhiej Čeračań, Šuškievič adkazvaje: «Pahladzim».
«Jon ščyra choča ŭdzielničać u palityčnym žyćci. Mnie padabajucca jahonyja niebanalnyja rašeńni. Budu mieć dačynieńnie da taho, što budzie rabić kandydat ad BSDH», — kaža Stanisłaŭ Šuškievič.
