U śpioku haradžanie paciahnulisia da vady. Minskija akvaparki, jaki raniej pustavali praz epidemiju, znoŭ prymajuć naviednikaŭ. Daviedalisia, u jakim režymie jany pracujuć i ci pryniali dadatkovyja miery biaśpieki.
Akvapark «Lebiadziny». Fota waterpark.by.
«Drymłend»: adkryty tolki basiejny
U akvaparku pad adkrytym niebam «Drymłend» abmiežavali kolkaść naviednikaŭ. Kali letaś u vychodnyja tam adpačyvała 4—6 tysiač čałaviek, to ciapier zapuskajuć da 2 tysiač.
Na ŭvachodzie paviesili antysieptyki, rabotniki akvaparku pracujuć u palčatkach i maskach.
«Horki nie pracujuć, kab nie ŭtvarać čerhi. Adkryty chvalevy basiejn i dziciačaja akvatoryja. Atrakcyjon «Lanivaja raka» płanujem zapuścić u lipieni», — raskazali ŭ akvaparku.
Vada ŭ basiejnach štoviečar apracoŭvajecca chimičnymi reahientami ad bakteryj i mikrobaŭ. Pravodzicca taksama sanapracoŭka ležakoŭ, nadzimanych kruhoŭ i kamizelek. Ležaki staviacca na adlehłaści paŭtara mietra adzin ad adnaho.
Pakolki akvapark pracuje ŭ abmiežavanym režymie, to i cana kvitkoŭ sioleta ŭ dva razy nižejšaja: 15 rubloŭ dla darosłych i 10 dla dziaciej u budzień i 20 i 15 rubloŭ — u vychadnyja.
«Lebiadziny»: dystancyja na horkach i dadatkovyja pryborki
Mienš haściej stali zapuskać i ŭ akvapark «Lebiadziny». Letaś tam mahło adpačyvać 2500 čałaviek adnačasova, u hety siezon — maksimum 1600.
Horki ŭsie pracujuć, ale piersanał sočyć za zachavańniem dystancyi. Kab nie źbiraŭsia natoŭp kala šafak, klučy vydajuć praź dźvie jačejki.
Čaściej stali pravodzić pryborki dezsrodkami. Vadu abiezzaražvajuć lampami ŭltrafijaletu, dadajuć srodki dla dezynfiekcyi, a 10% vady ŭ basiejnach abnaŭlajuć štodzień.
«My praciahvajem praktyku anłajn-tranślacyj z akvazony, kab naviednik samastojna moh padabrać čas dla adpačynku», — paviedamili ŭ akvaparku.
Piersanał zabiaśpiečyli srodkami indyvidualnaj abarony, štodzień mierajuć supracoŭnikam tempieraturu.
«Frystajł»: virus pamiraje pry 26 hradusach, a ŭ nas — 29
Akvapark «Frystajł» paśla dvuchmiesiačnaha pierapynku na dezynfiekcyju pracuje ŭ zvyčajnym režymie. Horki adkryty, basiejny i łaźnievy kompleks taksama.
Dziŭna, što na sajcie akvaparku ŭ paradach, jak nie zarazicca karanavirusam, apublikavany fejk. Tam skazana, što virus pamiraje pry tempieratury vyšej za 26 hradusaŭ Celsija, a pakolki ŭ akvaparku — 29, bajacca niama čaho. Kali b tak było nasamreč, virus nie pryžyvaŭsia b u čałaviečym arhaniźmie.
Čytajcie pa temie
Minski akvapark: My znajšli chałat Franaka Viačorki
