Raźlikovy rachunak Babaryki, na jakim znachodzicca sfarmiravany vybarčy fond, zabłakavany.
Siońnia pry sprobie ažyćciaŭleńnia płaciažoŭ za košt srodkaŭ vybarčaha fondu, supracoŭniki Biełarusbanka paviedamili, što raźlikovy rachunak Viktara Babaryki, na jakim znachodzicca sfarmiravany vybarčy fond, zabłakavany — aryštavanyja raschodnyja apieracyi pa rachunku, paviedamlaje jaho štab.
Ciapier na raźlikovym rachunku znachodziacca bolš za sto tysiač rubloŭ.
«Razam z tym, aryšt srodkaŭ vybarčaha fondu nie adabjecca na biahučaj dziejnaści štaba. U štabie i na pikietach pa zbory podpisaŭ pracujuć vałanciory, siabry inicyjatyŭnych hrup, jakija nie atrymlivajuć anijakich vypłat. Usie sabranyja podpisy buduć naležnym čynam vieryfikavanyja i padadzienyja ŭ adpaviednyja vybarčyja kamisii», — paviedamlaje štab.
Pieraśled kaleh Viktara Babaryki i ataki na jaho samoha pačalisia, kali stała viadoma, što jaho inicyjatyŭnaja hrupa sabrała rekordnuju dla alternatyŭnaha kandydata kolkaść podpisaŭ — 380 001 pa stanie na siońnia.
Raniej maksimum — 217 tysiač — sabraŭ u 1994-m, jašče na svabodnych vybarach, Zianon Paźniak. U Alaksandra Milinkieviča ŭ 2006-m było 198 tysiač. U Siamiona Domaša ŭ 2001-m — 164 tysiačy.
Čytajcie: Kolki podpisaŭ źbirali demakratyčnyja kandydaty na prezidenckich vybarach? TABLICA
Taksama i šerah apytańniaŭ pakazaŭ, što mienavita Viktar Babaryka moh by stać favarytam sumlennych vybaraŭ.
Babaryka sprabuje vybudavać šyrokuju antyłukašenkaŭskuju kaalicyju z udziełam samych roznych siłaŭ. Jaho kandydaturu padtrymała taksama nobieleŭskaja łaŭreatka Śviatłana Aleksijevič.
Pieratrusy ŭ Biełhazprombanku, mieniedžaram jakoha doŭhi čas byŭ Viktar Babaryka, i ŭ kampanijach siabroŭ Babaryki, adbylisia 11 červienia. Ni pra jakija pretenzii da hetych kampanij nie było viadoma, pakul hety bankir i miecenat nie zajaviŭ pra svaje prezidenckija ambicyi. Jon syšoŭ u adstaŭku z banka ŭ dzień, kali zajaviŭ pra svoj namier bałatavacca.
Sam Babaryka nazvaŭ dziejańni siłavikoŭ i zajavy Łukašenki ciskam na siabie.
«Usia maja dziejnaść, jakaja prachodziła na pasadzie kiraŭnika Biełhazprambanka ciaham 20 hadoŭ, nie vyklikała zaŭvah z boku pravaachoŭnych orhanaŭ, — skazaŭ jon 11 červienia. — My prachodzili ŭsie pravierki, u tym liku Nacbanka. Apošniaja — u studzieni. Ni razu pytańniaŭ nie było. Dziejańni siońniašniaha dnia nosiać zamoŭny charaktar», — skazaŭ jon.
Jon zaklikaŭ pravaachoŭnyja orhany trymacca zakonnaści.
«Ja čakaŭ cisku na mianie, i była infarmacyja, što ŭdar budzie pa mnie. Ale toje, što adbyłosia, pakazvaje, što suprać mianie ničoha niama. Ja hatovy da hetaha», — kaža Babaryka.
«Uvieś cynizm takich dziejańniaŭ u tym, što jany nakiravanyja nie na mianie, a nakiravanyja na maich siabroŭ i ludziej, ź jakimi ja pracavaŭ, — adznačyŭ pretendent na pasadu prezidenta ŭ svaim zvarocie. — Čamu heta zroblena? Bo pramoha kampramatu na mianie niama i ŭ ich jość vialikaja nadzieja, što ludziej zapałochajuć, prymusiać kazać niapraŭdu i ahavorvać druhich ludziej.
Ja mahu z dakładnaściu zajavić, što adzinymi pravilnymi pavodzinami i adkazam u hetaj situacyi, adkazam na hetaje biaźmiežža źjaŭlajecca praciah našaj baraćby.
Ja chaču źviarnucca da ŭsich tych, chto ŭžo padvierhsia dopytam, pieraśledam i vyklikam va ŭpaŭnavažanyja orhany.
Nie bojciesia kazać praŭdu. Nie kažycie chłuśniu, nie ahavorvajcie siabie i inšych ludziej. Kali treba, ja spadziajusia, što sumlennyja ludzi zaŭsiody akažuć vam dapamohu — jak jurydyčnuju, tak i materyjalnuju», — zajaviŭ Babaryka.
Ataki na Babaryku abvastryli tanalnaść jaho vystupaŭ.
«Samaja vialikaja pamyłka ŭ hetych dziejańniach ułady ŭ tym, što toj Biełarusi, jakaja była raniej i jakoj jany paturali, jak svaim statkam, bolš nie isnuje. Biełaruś pračnułasia. I ja chaču skazać, što novaja Biełaruś źmiacie reštki hetaha staroha režymu», — skazaŭ jon u videazvarocie.
Čytajcie taksama: Babaryka zapisaŭ videazvaroty na vypadak svajho zatrymańnia
