Hramadskaja kampanija «Hodna» pradstaŭlaje cykł videalikbiezaŭ «Hodnaja Biełaruś», pieršaja sieryja atrymała nazvu «Jak biełarusy stali narodam».
Zapłanavana 5 sieryj, u jakich, aproč historyi, pieraličym biełaruskija dasiahnieńni na ciapierašnim etapie, na padstavie hruntoŭnaha sacyjałahičnaha daśledavańnia ŭ prostaj i nahladnaj formie pakažam, jak biełarusy ŭsprymajuć sami siabie, raskažam pra dasiahnieńni vybitnych biełarusaŭ na radzimie i za miažoj, a taksama padumajem nad našaj budučyniaj.
My pasprabujem adkazać na dva hałoŭnyja pytańni: čym my možam hanarycca i što možam zrabić jašče lepš, kab heta było hodna?
Raspaviadaje kaardynatar hramadskaj kampanii «Hodna» Pavieł Biełavus:
— Sieryjał «Hodnaja Biełaruś» — heta adzin ź pieršych surjoznych prajektaŭ kampanii, jaki my robim razam sa studyjaj «Enot TV» u partniorstvie ź Mižnarodnaj niekamiercyjnaj arhanizacyjaj Pact pry padtrymcy Ahienctva ZŠA pa mižnarodnym raźvićci (USAID). Dalej budzie bolš, i my chočam, kab da kampanii sa svaimi idejami i praduktami dałučałasia ŭsio novyja i novyja jak kamiercyjnyja, tak i niekamiercyjnyja arhanizacyi.
Mahu adznačyć, što ŭžo ciapier sumiesna z «Budźma biełarusami!» i daśledčym centram Satio startavała ahulnanacyjanalnaje sacyjałahičnaje daśledavańnie pa temie biełaruskaj nacyjanalnaj identyčnaści i śviadomaści, letam płanujem prezientavać pieršyja vyniki hetaj maštabnaj pracy.
Paralelna idzie praca nad knihami: nacyjanalnaja ideja Biełarusi «Hodna» — sumiesna z BISS, «Ideja X» — sumiesna z «Jeŭraradyjo», zbornik biełaruskamoŭnych komiksaŭ «Hodna-nievierahodna» — sumiesna z «Našaj Nivaj».
U hetym miesiacy my praciahniem akcyju «Trymajsia Hodna»: usie achvotnyja zmohuć biaspłatna atrymać stykiery, płakaty, znački, maski, mahnity i inšyja rečy z łahatypam kampanii; raspačniom muzyčny marafon «Śpiavajem Hodna» — razam ź Sieržukom Doŭhušavym i zaprošanymi muzykami pasprabujem razam u anłajn-farmacie paśpiavać papularnyja biełaruskija pieśni; «Art Siadziba» rychtuje anłajn-fiestyval i viečarovaje anłajn-šou «Hodny kantent».
Adrazu paśla skančeńnia epidemii karanavirusa my pačniom padrychtoŭku forumu «Nacyjanalnaja ideja Biełarusi», tvorčaha konkursu i fiestyvalu «Hodna», moładzievaj škoły «Z Hodna», biznes-forumu «Tak, Hodna!» dy inšych cikavych prajektaŭ.
Padrabiaźniej pra kampaniju i jaje prajekty možna daviedacca ŭ sieryi rolikaŭ na YouTube-kanale «Hodna».
