Paryžskaja prakuratura pačała rasśledavańnie ŭ dačynieńni da eks-prezidenta Francyi (1974-1981) Valery Žyskar d'Estena, jakoha abvinavacili ŭ damahańniach. Sam jon usio admaŭlaje, piša Bi-bi-si.
Skarhu na 94-hadovaha eks-prezidenta padała niamieckaja žurnalistka An-Katryn Štrakie. Pa jaje słovach, u 2018 hodzie Žyskar D'Esten kranaŭsia jaje jahadzic padčas intervju.
37-hadovaja žurnalistka źviarnułasia ŭ palicyju 10 sakavika. Jana zajaviła, što jaje rašeńniu paspryjaŭ mižnarodny ruch #MeToo, udzielnicy jakoha zmahajucca z seksualnyja damahańniami.
U 2018-m Štrakie adpraviłasia ŭ Paryž, kab uziać intervju ŭ Žyskar d'Estena dla niamieckaha telekanała WDR.
Jana raspaviadaje, što paśla razmovy paprasiła prezidenta sfatahrafavacca ź joj i ŭsioj zdymačnaj hrupaj. Mienavita padčas zdymki, kaža žurnalistka, Žyskar d'Esten nibyta spačatku abniaŭ jaje za taliju, a potym apuściŭ ruki na jahadzicy žančyny. Pavodle jaje słoŭ, jana pasprabavała adšturchnuć jaho ruku, ale ŭ jaje nie atrymałasia.
Žyskar d'Estenu na toj momant było 92 hady.
Paśla zdymki, raspaviadaje žurnalistka, eks-prezident prapanavaŭ joj pahladzieć na fatahrafii, raźviešanyja ŭ jaho kabiniecie. U hety momant jon nibyta jašče raz dakranuŭsia da jahadzic. Kali jana pasprabavała adyści, jon zrabiŭ toje ž samaje treci raz, raspaviadaje Štrakie.
Pad kaniec sustrečy Žyskar d'Esten pacałavaŭ žurnalistku ŭ ščaku i na raźvitańnie pažadaŭ joj pryjemnych snoŭ «na niamieckaj movie».
Telekanał WDR zajaviŭ, što viedaje pra incydent i što padtrymlivaje skarhu spadaryni Štrakie.
Hazieta The New York Times atrymała zajavu advakataŭ Žyskar d'Estena, u jakoj havorycca, što jon nie pamiataje incydentu, pra jaki kaža niamieckaja žurnalistka.
Taksama jurysty adznačyli, što były prezident razhladaje mahčymaść padačy sustrečnaha pazovu za «nizkija i abraźlivyja napady» na jaho.
Zajava pradstaŭnikoŭ Žyskar d'Estena apublikavała i niamieckaje vydańnie Suddeutsche Zeitung, u jakich hetak ža havorycca, što eks-prezident nie pamiataje, što adbyłosia padčas jaho sustrečy sa spadaryniaj Štrakie.
«Kali b hetyja śćviardžeńni byli praŭdzivymi, jamu, viadoma, było b vielmi škada. Ale jon pra heta ničoha nie pamiataje».
