Ministerstva zamiežnych spraŭ Ukrainy inicyjuje častkovaje spynieńnie dziejańnia mižuradavaha pahadnieńnia ź Biełaruśsiu ab biaźvizavym režymie pajezdak, piša «Radyjo Svaboda».
Adpaviedny prajekt pastanovy siońnia na svaim pasiadžeńni razhledzić ukrainski ŭrad, a źmieny nabuduć moc ad 1 vieraśnia.
Jak patłumačyli ŭ Ministerstvie zamiežnych spraŭ Ukrainy, źmieny zakranuć tolki praviły vyjezdu hramadzian Ukrainy na terytoryju Biełarusi: «Havorka idzie ab tym, što takija pajezdki ŭkraincy z 1 vieraśnia zmohuć ažyćciaŭlać tolki na padstavie zamiežnaha pašparta».
Dyplamaty ŭdakładnili, što zhodna z normami mižuradavaha pahadnieńnia kožny bok maje prava całkam abo častkova spynić dziejańnie asobnaj normy ŭ tym vypadku, kali heta pradyktavana nieabchodnaściu harantavańnia biaśpieki dziaržavy. Aproč taho, zakanadaŭstva Ŭkrainy praduhledžvaje, što ŭkraincy mohuć vyjaždžać za miežy krainy na padstavie zamiežnaha (bijametryčnaha) pašparta.
U vypadku ž ź Biełaruśsiu ŭvieś hety čas dazvalaŭsia vyjezd na padstavie ŭnutranaha pašparta, jakim ciapier va Ŭkrainie źjaŭlajecca plastykavaja kartka (ID-kartka). Ale Biełaruś nie pryznała jaje jak dakument, jaki dazvalaje ŭjezd i vyjezd, tranzyt i znachodžańnie ŭkraincaŭ na biełaruskaj terytoryi. Jak vynik, Ukraina vymušana była ŭnosić źmieny ŭ praviły vyjezdu dla ŭkraincaŭ.
Dla hramadzian Biełarusi praviły ŭjezdu va Ŭkrainu ci vyjezdu ź jaje nia źmieniacca
Na siońnia pamiežny kantrol miž Ukrainaju i Biełaruśsiu rehulujecca pahadnieńniem ab biaźvizavych pajezdkach hramadzian, padpisanym u červieni 2009 hodu. Jano praduhledžvaje pieralik dakumentaŭ, ź jakimi hramadzianie Biełarusi i Ŭkrainy majuć prava ŭjaždžać na terytoryju krainaŭ. U hetym pieraliku bijametryčny pašpart, jak i abaviazkovaje źniaćcie adbitkaŭ palcaŭ, adsutničaje.
Zhodna z artykułam 4 hetaha pahadnieńnia, baki abaviazany nieadkładna infarmavać adzin adnaho praz dyplamatyčnyja kanały ab uviadzieńni novych dakumentaŭ abo ŭniasieńni źmienaŭ u pieralik dakumentaŭ, jakija vykarystoŭvajucca dla ŭzajemnych pajezdak, i adnačasova dasłać adzin adnamu ichnyja ŭzory.
U artykule 6 praduhledžana, što kožnaja z krain maje prava całkam abo častkova prypynić dziejańnie asobnych pałažeńniaŭ pahadnieńnia, kali heta nieabchodna dla harantavańnia biaśpieki dziaržavy, zachavańnia hramadzkaha paradku abo achovy zdaroŭja nasielnictva. Ale pra pryniaćcie takich zachadaŭ baki abaviazany paviedamić adzin adnamu praz dyplamatyčnyja kanały.
Pahadnieńnie ab biaźvizavych pajezdkach hramadzian Biełarusi i Ŭkrainy padpisana na nieabmiežavany čas, ale kožny z bakoŭ moža denansavać jaho, paviedamiŭšy pra heta druhomu boku ŭ piśmovaj formie. U takim vypadku pahadnieńnie stracić moc pa zakančeńni 6 miesiacaŭ z daty paviedamleńnia.
