Eks-dyrektar Parka vysokich technałohij Valeryj Capkała daŭ pieršaje intervju paśla taho, jak zajaviŭ pra svaje prezidenckija ambicyi. Jon parazmaŭlaŭ z partałam dev.by, ale nie daŭ dazvoł na publikacyju tekstu, zapatrabavaŭšy zrabić jaho bolš litaraturnym.
Valeryj Capkała, fota Siarhieja Hudzilina
Žurnalisty nie pajšli na jaho ŭmovy i apublikavali padborku cytat ź intervju.
Takim čynam, jon paviedamiŭ, što:
— Znachodzicca ŭ Minsku.
— Udzieł u vybarčaj kampanii nie byŭ spantannym rašeńniem, jon «daŭno da hetaha išoŭ» (Capkały nie było ŭ miedyjnaj prastory kala troch hadoŭ, vyklučeńnie — publičnaja lekcyja ab startapach i technałohijach u listapadzie 2018-ha).
— Nie choča kamientavać zdahadku ab tym, što źjaŭlajecca sparynh-partnioram Łukašenki i «spojleram śpiecyjalna dla ajcišnikaŭ»: ličyć, što hipotezu pra sparynh-partniora mohuć prasoŭvać tolki tyja, chto nie čytaŭ jaho zajavy, — tam jość usia infarmacyja.
— Stvaryć vybarčy fond nie paśpieŭ: zamiest dvuch miesiacaŭ na heta adviali piać dzion, tłumačyć Capkała. Pakul nijakija hrošy na vybarčuju kampaniju nie vykarystoŭvajucca: ludzi pracujuć na entuzijaźmie.
— Kampanija budzie prafinansavanaja z ułasnych srodkaŭ: dla hetaha Valeryj Capkała pradaŭ pryvatny dom za Nacyjanalnaj biblijatekaj (učastak dla zabudovy Valeryj Capkała atrymaŭ u arendu na ekskluziŭnych umovach za 231 rubiel u hod, a košt i vybar padradčyka dla budaŭnictva doma vyklikali pytańni ŭ orhanaŭ).
Čytajcie taksama:
Capkała aranduje ziamlu pad katedž za Nacbiblijatekaj. Płacić pa 20 rubloŭ na miesiac
Capkała terminova pradaŭ svoj katedž u kvartale za Nacbiblijatekaj
— Paćvierdziŭ źviestki «Našaj Nivy», što jahony dom budavaŭ adzin z padradčykaŭ, jakija ŭdzielničali ŭ zabudovie abjektaŭ PVT. Kankretnuju arhanizacyju nie nazvaŭ, adznačyŭšy, što «ŭ budaŭnictvie [PVT] brali ŭdzieł kala dziasiatka hienpadradnych arhanizacyj i kala 400 subpadradnych».
— Infarmacyju «Našaj Nivy» ab pytańniach kampietentnych orhanaŭ da budaŭnictva doma Capkała źniapraŭdziŭ. Jon paviedamiŭ dev.by, što budavaŭ dom za košt ułasnych srodkaŭ bolš za 8 hadoŭ, z padradčykam byŭ zaklučany aficyjny dahavor. «Vy viedajecie, jak pracuje budaŭničaja sistema: składajucca akty ab praviedzienych pracach, [unosiacca] metavyja avansy, kožnaja kapiejka vyrazna praličvajecca. Usio było kapiejka ŭ kapiejku». Pry hetym, pavodle słoŭ Capkały, padradčyk nie vykanaŭ umovy dahavora, i pa vynikach hramadzianskaha razboru sud heta pryznaŭ. Tym nie mienš padradčyk nie vypłaciŭ hrošy pa rašeńni suda, jon zbankrutavaŭ kampaniju.
— Ekskluziŭnyja ŭmovy arendy ziamli, pra jakija piša «Naša Niva», Capkała taksama abvierh: skazaŭ, što ŭ biudžet byŭ vypłačany aficyjny kadastravy košt ziamli ŭ poŭnym abjomie. «Na toj čas, kali nie pamylajusia, jon składaŭ kala 70 tysiač dalaraŭ».
— Da vybarčaj kampanii nie maje dačynieńnia ni adna ź IT-kampanij. U kamandzie jość prahramisty, ale heta nie kiraŭniki i ŭładalniki biznesu.
— Paśla sychodu z pasady kiraŭnika PVT u Valeryja Capkały było niekalki krynic dachodu. U pryvatnaści, kansultacyi ŭradaŭ Azierbajdžana, Hruzii, Uźbiekistana pa stvareńni inavacyjnych infrastruktur; taksama kansultavaŭ adnu amierykanskuju kampaniju i vystupaŭ kansultantam PRAAN u halinie elektronnaha ŭrada.
— Jon nie identyfikuje siabie z apazicyjaj. «Ja nie ŭ apazicyi da dziejnaj ułady i naohuł ni da kaho nie ŭ apazicyi. Ja prosta chaču, kab Biełaruś była inšaj krainaj: kab my narmalna žyli, narmalna pracavali, biznes narmalna raźvivaŭsia, kab u nas byli efiektyŭnyja sielskaja haspadarka i pramysłovaść, kab u nas była lepšaja sistema adukacyi, achovy zdaroŭja i h. d. [ … ] Ja liču, što ŭ nas pavinna być takaja palityčnaja sistema, dzie było b miesca roznym pohladam, roznamu bačańniu raźvićcia krainy».
— Zadadzieny kapsłokam u dopisie-anonsie kirunak «nie ŭ bok zachodu, a ŭ bok uschodu» nie aznačaje pierśpiektyvy ščylnaha siabroŭstva z Rasijaj i naohuł nie maje dačynieńnia da hieapalityki. U toj ža čas Capkała ličyć, što treba budavać dobryja adnosiny z usimi krainami ŭ śviecie biez vyklučeńnia, i na Zachadzie, i na Uschodzie, uklučajučy krainy Azii z vopytam efiektyŭnych reformaŭ. Pry hetym «Rasija, ja hłyboka pierakanany, zaŭsiody budzie, napeŭna, samym hałoŭnym palityčnym i ekanamičnym partnioram, heta nie zaležyć ad našych žadańniaŭ, padabajecca nam heta ci nie. Nas hieapalityčny los raźmiaściŭ tut, i my nie možam sieści ŭ inšuju łodku i płyć tudy, dzie klimat ciaplejšy».
— Jon padrychtavaŭ prahramu, jakaja «budzie padziejaj u žyćci nie tolki Biełarusi, ale i ŭsioj postsavieckaj prastory».
— Prahrama źviernutaja nie tolki da ajcišnikaŭ. «Ajcišniki mianie i tak viedajuć, niama nieabchodnaści da ich źviartacca. Jana źviernutaja da ŭsich astatnich słajoŭ biełaruskaha hramadstva».
— Alternatyŭny šlach raźvićcia dla Biełarusi, jaki prapanuje prahrama, «akumulavany z vopytu samych paśpiachovych krain».
— Častka prahramy — pra raźvićcio startap-ruchu, nie tolki ŭ IT, ale «va ŭsich siektarach narodnaj haspadarki: jak vykarystoŭvać isnujučuju niapravilnuju infrastrukturu starych zavodaŭ dla raźvićcia startap-ruchu».
— U liku svaich kumiraŭ i aryjenciraŭ nazyvaje Džordža Vašynhtona, Abrama Linkalna, Li Kuan Ju, Piatra Stałypina.
— U jaho, «napeŭna, nie zastałosia» kryŭdy z-za adstaŭki. Jon rady tamu, što za apošnija 3 hady PVT vyras pa kolkaści rezidentaŭ u 5 razoŭ. «Dy dziakuj Bohu! Ja prosta nie razumieju, za košt čaho heta adbyłosia: heta arhaničny rost [ci niešta inšaje]. Vydatna staŭlusia. Čamu ja pavinien drenna stavicca da taho, što rastuć kampanii, raście ekspart, raźvivajecca prajekt? Heta samaje hałoŭnaje: pravilny prajekt praciahvaje raźvivacca, navat kali ty jaho pakinuŭ, niezaležna ad taho, chto pryjšoŭ paśla ciabie». «Kazać, što ja drenna staŭlusia da PVT, — heta toje ž samaje, što kazać Džordžu Vašynhtonu: jak ty stavišsia da Kanstytucyi ZŠA, da taho, što vyjhraŭ vajnu za niezaležnaść i stvaryŭ ZŠA?». (U listapadzie 2018 hoda jon ahučvaŭ inšaje mierkavańnie: chutki rost PVT źnižaje jaho jakaść, a startapam naohuł nie treba ŭ Park. Na momant adstaŭki Valeryja Capkały ŭ 2017 hodzie paśla 11 hadoŭ na pasadzie ŭ PVT było 165 kampanij, ciapier — 818.)
— Novych kardynalnych źmien u vypadku prychodu da ŭłady dla PVT nie budzie. «Navošta? Heta majo dziecišča. Ja im hanarusia. Ja patraciŭ 12 hadoŭ na toje, kab spačatku ŭhavaryć usich, a potym arhanizavać hety prajekt. Ja pa-raniejšamu ŭ vydatnych adnosinach z bolšaściu IT-kiraŭnikoŭ, uładalnikaŭ biznesu, dyrektarami i h. d.»
— Jon admaŭlajecca acanić vierahodnaść svajoj pieramohi ŭ vybarach: heta varažba na kavavaj huščy.
