Delfi
29 krasavika ŭrad Litvy ŭchvaliŭ jašče niekalki pasłableńniaŭ: žychary zmohuć vyjazdžać za miežy krainy, z 10 maja dazvolać adnavić avijaznosiny, na adkrytych prastorach zmohuć prachodzić nievialikija mierapryjemstvy. Bolšaja častka novych praviłaŭ ustupić u siłu z 30 krasavika, piša Delfi.lt.
«Situacyja zastajecca dosyć dobraj, treba dumać, jak iści napierad z peŭnymi rašeńniami», — skazaŭ ministr achovy zdaroŭja Aŭrelijus Viaryha.
Adkryjucca ŭsie handlovyja miescy, uklučajučy rynki, dazvalajucca ŭsie formy volnaha času na adkrytym pavietry pry biaśpiečnaj dystancyi. Mnohija praviły, za vyklučeńniem avijaznosin, nabuduć moc z 4 maja.
Da hetaha času ź Litvy mahli źjechać tolki hramadzianie inšych krain i asoby, jakija vyjazdžali za miežy krainy na pracu. Da hetaha času na rynkach možna było pradavać tolki pradukty charčavańnia. Ciapier dazvoleny handal usimi tavarami. Taksama dazvoleny bolš svabodny paradak našeńnia masak. Kali da hetaha času ŭ hramadskich miescach nielha było chadzić biez maski (vyklučeńnie tyčyłasia tolki kafe, dzie ludzi jaduć i pjuć), to ciapier masku možna nie nasić za miežami nasielenaha punkta (horada, miastečka, vioski, chutary, sadavodčaha tavarystva) i pry ŭmovie adsutnaści ludziej pablizu ŭ radyusie 20 m.
Maski taksama nie treba nadziavać u aŭtamabili, kali kiroŭca i pasažyry — svajaki. Taksama płanujuć adnavić pradastaŭleńnie płanavych pracedur achovy zdaroŭja, adnak balnicy pavinny pakinuć reziervovyja łožki dla mahčymych chvorych na karanavirus.
Litva ŭviała strohi karancin adnoj ź pieršych. Pa stanie na 29 krasavika tam 1375 chvorych na karanavirus (505 na 1 młn čałaviek), 45 čałaviek pamierli.
U Biełarusi pavodle źviestak Minzdaroŭja 13 181 vypadak karanavirusa (1 395 na 1 młn čałaviek).
Učora Minzdaroŭja Litvy paviedamiła, što pamyłkova zaličyła 110 vypadkaŭ stanoŭčych testaŭ, tamu ich adminusavali.
