Photo News / lesoir.be
U Bielhii achviaraj Covid-19 staŭ adzin z apošnich acalełych śviedak Chałakostu. 94-hadovy Anry Kička pamior u subotu ŭ bruselskim domie dla sastarełych, piša «Radyjo Svaboda».
Anry Kička ŭ hady Druhoj suśvietnaj vajny byŭ siarod vyžyłych viaźniaŭ nacysckaha kancłahiera Aśviencim.
U studzieni 2020 hoda jon raspaviadaŭ VVS pra svoj žyćciovy dośvied, u pryvatnaści, nazvaŭšy Aśviencim uvasableńniem śmierci. Jaho syn Majkł Kička napisaŭ u Fejsbuku: «Mikraskapičny karanavirus damohsia taho, čaho nie damahłasia cełaja nacysckaja armija. Moj baćka vyžyŭ padčas «maršu śmierci», ale siońnia zaviaršyŭsia jahony marš žyćcia».
Anry Kička naradziŭsia ŭ Bruseli ŭ 1926 hodzie ŭ habrejskaj siamji vychadcaŭ z Polščy. Jaho baćki ŭciakli ad chvali antysemityzmu va Uschodniaj Jeŭropie, kab pačać novaje žyćcio na Zachadzie. Akupacyja nacystami Bielhii nie pakinuła im miesca, dzie jany mahli b schavacca, i vielmi chutka, u 1942 hodzie, jany byli departavanyja.
Baćka chłopčyka pavinien byŭ prymusova pracavać, u toj čas jak žančyny ź jaho siamji, maci i siostry, a taksama ciotka, byli adpraŭlenyja ŭ Aśviencim, dzie vielmi chutka byli nakiravanyja ŭ hazavyja kamiery, paśla čaho ich spalili ŭ łahiernych piečach.
