Ułady majuć namier patracić ad 5 da 6 miljardaŭ rubloŭ na padtrymku ekanomiki i sacyjalnaj śfiery dla minimizacyi ŭpłyvu na ekanomiku suśvietnaj epidemijałahičnaj situacyi. Dla hetaha ŭrad raźličvaje pryciahnuć źniešnija pazyki na 2-2,5 miljarda dalaraŭ. Pra heta paviedamiŭ namieśnik premjer-ministra Biełarusi Dźmitryj Kruty, pieradaje telekanał «Biełaruś-1», piša Tut.by.
Dźmitryj Kruty raspavioŭ, što ŭłady padrychtavali dva novyja pakiety padtrymki ekanomiki i sacśfiery. Adzin ź ich na nastupnym tydni płanujuć pradstavić na razhlad prezidentu. Uvohule na miery pa padtrymcy ekanomiki moža pajści ad 5 da 6 miljardaŭ rubloŭ. Pa słovach Dźmitryja Krutoha, havorka idzie pra pramuju i ŭskosnuju dapamohu. Dla hetaha naša kraina maje namier źviarnucca pa dapamohu źniešnich kredytoraŭ, u tym liku MVF, Suśvietnaha banka, Jeŭrapiejskaha inviestycyjnaha banka, Banka raźvićcia Kitaja.
«Praktyčna ŭsie ź ich atrymali našy zajaŭki, ciapier idzie štotydniovaja praca, kab pastaracca pryciahnuć i resursy, razhruzić biudžet, padtrymać ustojlivaść našaha dziaržaŭnaha doŭhu i mahčymaści jaho refinansavańnia ŭ tych abjomach, u jakich my płanavali ŭ pačatku hoda. Tamu nichto ź ich nie admoviŭ», — udakładniŭ pieršy namieśnik premjer-ministra.
Dźmitryj Kruty taksama raspavioŭ, ab jakich sumach zapazyčańniaŭ idzie havorka:
— Kali kazać pra pieramovy z MVF, to ŭ ramkach našaj kvoty heta blizu 900 miljonaŭ dalaraŭ, Suśvietny bank — heta pieramovy prykładna na 300 miljonaŭ dalaraŭ, Jeŭrapiejski inviestycyjny bank — heta taksama prykładna 300 miljonaŭ dalaraŭ. Heta značyć sumarna dzieści prykładna 2-2,5 miljarda dalaraŭ my zmožam pryciahnuć ad źniešnich kredytoraŭ. Heta buduć vielmi dobryja ličby, — raspavioŭ jon.
