U piatnicu, 24 krasavika, u ranišniaj pieradačy na telekanale «RTR-Biełaruś» pakazali zaradku sa spartoŭcam Vitalom Hurkovym. U efiry jon byŭ u šeraj majcy z «Pahoniaj» na rukavie. Adnak hledačy heta nie ŭbačyli: hierb na videa… prosta zamazali.
Zamazali navat adbitak u lusterku!
Vital Hurkoŭ tolki paśmiajaŭsia, kali pačuŭ pra heta. Jon raskazaŭ «NN», što padčas padrychtoŭki siužeta nijakich pytańniaŭ da adzieńnia nie było.
«Damovilisia pra zapis praktykavańniaŭ, zdymačnaja hrupa pryjšła da mianie ŭ zału. Na mnie była maja zvyčajnaja trenirovačnaja cišotka, imiannaja, z «Pahoniaj» na rukavie», — kaža spartoviec.
Hurkova naohuł nie časta kličuć na dziaržaŭnaje telebačańnie (choć na STB jon viadzie pieradaču «Tydzień sportu»).
«To mikrafony łamalisia, kali mianie ŭ studyju zaprašali, to jašče štości…
Hod tamu na «Biełaruś-5» chacieli źniać vialiki vypusk pra mianie, z roznych bakoŭ pakazać — trenirovačnaje žyćcio, repietycyi. Miesiacy dva ŭprošvali, kab pryniaŭ udzieł, potym čatyry dni zdymali. Navat zapisali, jak ja zaprašaŭ na spatkańnie Mielicinu Staniutu.
Ja na svaim aŭto vaziŭ zdymačnuju hrupu na kancert u Harodniu. A ŭ vyniku siužet zabaranili pakazvać», — uspaminaje historyju Vital.
«Naša Niva» źviarnułasia pa tłumačeńnie da telekanała STB (im naležyć «RTR-Biełaruś»). Dyrektarka śpiecprajektaŭ Nastaśsia Savickaja adkazała, što kankretna nakont «Pahoni» nijakich ukazańniaŭ nie davałasia.
Fota ctv.by
«U nas pryniata zakryvać prajavy rekłamy i inšych vizualnych emblemaŭ, jakija adciahvajuć uvahu hledača ad asnoŭnaha siužeta», — prakamientavała jana.
