Subota, 25 krasavika, budzie zvyčajnym vučebnym dniom u škołach. Dzieci, jakija pryjduć na zaniatki, buduć vučycca pa raskładzie paniadziełka, 27 krasavika. Hetuju infarmacyju TUT.BY paviedamili nastaŭniki z troch roznych rehijonaŭ Biełarusi.
27 krasavika dla bolšaści biełarusaŭ budzie vychodnym. Hety dzień my adpracavali 4 krasavika, kali ŭ školnikaŭ byli viasnovyja kanikuły.
U sieradu, 22 krasavika, mnohija ŭstanovy adukacyi stali atrymlivać infarmacyju, što jany buduć pracavać i adpačyvać pa-inšamu. U TUT.BY apynułasia kopija rasparadžeńnia Ministerstva adukacyi, u jakim viedamstva «ličyć nieabchodnym pravieści navučalnyja zaniatki 25 krasavika 2020 hoda z ulikam pieranosu vučebnaha dnia z 27 krasavika 2020 hoda». U im adznačajecca, što z ulikam śpiecyfiki pracy ŭ arhanizacyj jość prava pieranosić pracoŭnyja dni ŭ inšym paradku zhodna z pastanovaj Savieta Ministraŭ № 688. Dakumient padpisany namieśnikam ministra Alaksandram Kadłubajem.
Takim čynam, dzieci i nastaŭniki buduć adpačyvać 26, 27 i 28 krasavika.
Nastaŭniki adznačajuć, što takim čynam pieranosy rabili zaŭsiody. U subotu dzieci vučacca pa raskładzie paniadziełka, a ŭ paniadziełak prachodzić šosty školny dzień.
Ci buduć škoły pracavać u aficyjny vychodny — 1 Maja, pakul nieviadoma.
Nahadajem, tydzień tamu Alaksandr Łukašenka zajaviŭ, što paśla praciahłych kanikuł školniki buduć vučycca ŭ subotu, kab nahnać upuščanaje.
— Heta budzie poŭny navučalny dzień, a nie prosta tam uroki pracy i fakultatyvy. Tydzień ža prahulali lišni. I pieršaha čysła (pieršaha maja) taksama budziem vučycca, a druhoha i treciaha — budzie vychodny. Voś my dva dni hetych voźmiem i ŭščylnim, nam, moža, navat letam nie spatrebicca brać dni ŭ červieni miesiacy. Voś tak treba pastupić.
