Zdareńnie adbyłosia 14 studzienia ŭ Maładziečnie na centralnaj vulicy horada Vialiki Haściniec, paviedamlaje kraj.by.
A treciaj nočy da zaspanych susiedziaŭ pryjšoŭ mužčyna i ź ich telefona pazvaniŭ pa numary 101. Mužčyna zajaviŭ vyratavalnikam, što ŭ padjeździe jaho doma ŭstanoŭlena raściažka z hranataj.
Jak raspavioŭ pamočnik prakurora Maładziečanskaha rajona Valeryj Piarkoŭski, u mužčyny jość svaja siamja, małoje dzicia, ale 14 studzienia jon načavaŭ u kvatery maci. Siarod nočy jon paprasiŭ u susiedziaŭ patelefanavać, tamu što napiaredadni abarvaŭ pravady ŭłasnaha telefona.
Na miesca, akramia supracoŭnikaŭ MNS, tut ža vyjechali apieratyŭnyja rabotniki milicyi, vyklikali minioraŭ. Mužčyna sustrakaŭ usich asabista i z akna papiaredžvaŭ, kab jany byli aściarožnyja.
Mužčyna byŭ pjany i mocna ŭzbudžany. Kab jaho supakoić, vyklikali navat chutkuju dapamohu.
Naturalna, što nijakich śladoŭ raściažki i vybuchovaniebiaśpiečnych pradmietaŭ nie vyjavili.
— Padobna na toje, što na hlebie złoŭžyvańnia ałkaholem u mužčyny paŭstali niejkija pryvidy. Ale ekśpiertyza ŭstanaviła, što jon moh uśviedamlać svaje dziejańni i adkazvać za ŭčynki, — skazaŭ pamočnik prakurora.
Sprava razhladałasia pa pieršaj častcy artykuła 340 Kryminalnaha kodeksa Respubliki Biełaruś «Zahadzia iłžyvaje paviedamleńnie ab niebiaśpiecy». Sud vynies vierdykt — 3 miesiacy aryštu i prymusovaje lačeńnie ad ałkahalizmu.