Čałaviectva moža sutyknucca z hoładam «biblejskich maštabaŭ» praz pandemiju karanavirusa, kali nie zabiaśpiečyć charčovuju biaśpieku. Pra heta zajaviŭ vykanaŭčy dyrektar Suśvietnaj charčovaj prahramy (SCHP) AAN Devid Biźli, piša rbc.ru.
Pavodle SCHP, da kanca 2020 hoda z vostrym niedachopam charčavańnia ŭ śviecie mohuć sutyknucca 265 miljonaŭ čałaviek. Heta ličba ŭdvaja bolš za letašniuju — praz karanavirus na miažy hoładu akazalisia 130 młn čałaviek. Pa słovach viadučaha ekanamista prahramy Aryfa Chusejna, režym samaizalacyi i ekanamičnaja recesija ŭžo ŭdaryli pa žycharach haładajučych krain.
Havorka idzie, pierš za ŭsio, pra krainy Afryki, dzie žyvie pałova haładajučych. Jašče 43 młn čałaviek, jakija sutykajucca z hoładam, pražyvajuć na Blizkim Uschodzie i ŭ Azii. 18,5 młn — u krainach Karybskaha basiejna i Łacinskaj Amieryki.
U aŭtaraŭ dakładu Hłabalnaj sietki pa baraćbie z charčovymi kryzisami (u jaje ŭvachodzić SCHP) aściarohu vyklikaje taksama situacyja na paŭdniovym uschodzie Ukrainy.
Biźli nazvaŭ pandemiju karanavirusa «najhoršym humanitarnym kryzisam z časoŭ Druhoj suśvietnaj vajny». Pavodle jaho słoŭ, biez dapamohi SCHP «štodnia ad hoładu buduć pamirać 300 tysiač čałaviek, i tak na praciahu troch miesiacaŭ». Biźli dadaŭ, što hetyja ličby nie ŭličvajuć nastupstvy pandemii.
Pavodle adnaho sa scenaryjaŭ prahramy, hoład pašyrycca ŭ 30 krainach śvietu. U dziesiaci ź ich užo zaraz kala miljona čałaviek znachodziacca na miažy hałodnaj śmierci.
U pačatku krasavika ŭ AAN paviedamili, što z-za karanavirusa 8,3 miljona čałaviek u arabskim rehijonie apynucca za rysaj biednaści, a kolkaść tych, chto niedaatrymlivaje pradukty charčavańnia, vyraście na 2 młn. Pry hetym užo ciapier u arabskich krainach bolš za 101 miljon čałaviek znachodzicca na miažy halečy, a 52 młn — niedajadajuć.
